Pune Crime News : पुणे शहरातील सहकारनगर परिसरात मध्यरात्री गावगुडांनी हैदोस घालत वीस ते पंचवीस वाहनांची तोडफोड केली आहे. मिळालेल्या माहितीनुसार, ही घटना २३ जुलै रात्री पावनेबारा ते दोन वाजण्याच्या दरम्यान घडली असल्याची माहिती आहे. तसेच यावेळी दोघांना मारहाण देखील करण्यात आली असून, त्यांच्यावर रुग्णालयात उपचार सुरू आहेत.

धनकवडी परिसरात केशव कॉम्प्लेक्स, सरस्वती चौक, नवनाथ नगर या ठिकाणी तीन ही तोडफोड करण्यात आली आहे. या तोडफोडीच्या घटनेमुळे परिसरात भीतीचे वातावरण पसरले आहे. पोलिसांनी दिलेल्या माहितीनुसार, गुन्हेगार वाहनांच्या रस्त्यावर असलेल्या पार्किंगवर तुफान हाणामारी करत फिरत होते. त्याचवेळी त्यांना थांबवण्याचा प्रयत्न करणाऱ्या दोन नागरिकांना मारहाण करण्यात आली. या मारहाणीत दोघेजण जखमी झाले आहेत. त्यांना रुग्णालयात दाखल करण्यात आले असून, त्यांच्यावर उपचार सुरू आहेत. 

या घटनेची माहिती मिळताच सहकारनगर पोलिसांनी घटनास्थळी धाव घेतली. याप्रकरणी पोलिसांनी अज्ञातांवर गुन्हा दाखल करण्याची प्रक्रिया सुरू केली आहे. परिसरातील सीसीटीव्ही फुटेज तपासत असून, आरोपींची ओळख पटवण्याचे काम सुरू असल्याची माहिती आहे.