Vice Presidential Election 2025 : केंद्रातील सत्तारूढ आघाडीने (एनडीए) रविवारी उपराष्ट्रपतिपदाच्या निवडणुकीसाठी आपला उमेदवार निश्चित केला. एनडीएने सस्पेन्स संपवत महाराष्ट्राचे राज्यपाल सी.पी.राधाकृष्णन यांची उमेदवारी जाहीर केली. समर्थकांकडून तमिळनाडूचे मोदी म्हणून उल्लेख होणारे राधाकृष्णन राष्ट्रीय स्वयंसेवक संघाची पार्श्वभूमी असणारे मूळचे भाजपचे नेते आहेत. माजी उपराष्ट्रपती जगदीप धनखड यांनी मागील महिन्यात तडकाफडकी राजीनामा दिला. त्यामुळे ते रिक्त पद भरण्यासाठी ९ सप्टेंबरला निवडणूक होणार आहे. त्या निवडणुकीसाठी उमेदवार ठरवण्याचे सर्वांधिकार याआधीच एनडीएच्या घटक पक्षांनी पंतप्रधान नरेंद्र मोदी आणि भाजपचे अध्यक्ष जे.पी.नड्डा यांना दिले. त्या पार्श्वभूमीवर, भाजपच्या संसदीय मंडळाची रविवारी बैठक झाली. मोदींच्या उपस्थितीत झालेल्या त्या बैठकीत राधाकृष्णन यांच्या नावावर शिक्कामोर्तब करण्यात आले. त्यांची उमेदवारी निश्चित करताना भाजपने पुन्हा एकदा धक्कातंत्राचा अवलंब केला. एनडीएचे संभाव्य उमेदवार म्हणून अनेक नावांची चर्चा काही दिवसांपासून सुरू होती. प्रामुख्याने विद्यमान राज्यपालांपैकी एकाला बढती मिळेल, अशी सर्वांधिक शक्यताही वर्तवली गेली. मात्र, त्या नावांमध्ये राधाकृष्णन यांचा समावेश नव्हता. त्यामुळे ओबीसी समाजाचे सदस्य असणाऱ्या ६८ वर्षीय राधाकृष्णन यांच्या उमेदवारीने बहुतेक सर्वांचेच अंदाज चुकले. उपराष्ट्रपती निवडणुकीसाठी मतदान करण्याचा अधिकार केवळ राज्यसभा आणि लोकसभा या संसदेच्या दोन्ही सभागृहांतील खासदारांना आहे. त्या सभागृहांमधील सध्याचे संख्याबळ विचारात घेता एनडीएच्या उमेदवाराचा विजय निश्चित मानला जातो. मूळचे तमिळनाडूचे असणारे राधाकृष्णन जवळपास ४० वर्षांपासून सार्वजनिक जीवनात सक्रिय आहेत. विद्यार्थी दशेतच ते राष्ट्रीय स्वयंसेवक संघाशी जोडले गेले. त्यानंतर भारतीय जनसंघ आणि भाजपच्या माध्यमातून ते राजकारणात सक्रिय झाले. ते वर्ष १९९८ आणि १९९९ मध्ये सलग दोनवेळा तमिळनाडूच्या कोईंबतूर मतदारसंघातून लोकसभेवर निवडून गेले. पुढील काळात त्यांना विविध राज्यांचे राज्यपालपद भुषवण्याची संधी मिळाली.
