Pahlaj Nihalani Passes Away : हिंदी चित्रपटसृष्टीतील ज्येष्ठ चित्रपट निर्माते तसेच केंद्रीय चित्रपट प्रमाणन मंडळाचे (सीबीएफसी) माजी अध्यक्ष पहलाज निहलानी यांचे गुरुवारी वयाच्या ७६व्या वर्षी निधन झाले. ते काही काळापासून यकृताशी संबंधित आजाराने त्रस्त होते. त्यांच्या निधनामुळे बॉलिवूडसह चित्रपट क्षेत्रात हळहळ व्यक्त करण्यात येत आहे.

सीबीएफसीच्या अध्यक्षपदाची सांभाळली जबाबदारी –

निर्माते म्हणून तसेच चित्रपट सेन्सॉरशिपविषयक ठाम भूमिकेमुळे निहलानी यांची स्वतंत्र ओळख निर्माण झाली होती. २०१५ ते २०१७ या कालावधीत त्यांनी सीबीएफसीच्या अध्यक्षपदाची जबाबदारी सांभाळली. त्यांच्या कार्यकाळात अनेक चित्रपटांच्या प्रमाणनासंदर्भातील निर्णय चर्चेचा विषय ठरले होते. या निर्णयांमुळे अभिव्यक्ती स्वातंत्र्य आणि चित्रपट सेन्सॉरशिप या मुद्द्यांवर देशभरात व्यापक चर्चा रंगली होती.

या चित्रपटांना मिळाला मोठा प्रतिसाद –

पहलाज निहलानी यांनी १९८२ मध्ये प्रदर्शित झालेल्या हातकडी या चित्रपटाद्वारे निर्माता म्हणून कारकीर्द सुरू केली. त्यानंतर त्यांनी आंखें, अंदाज, तलाश, रंगीला राजा आणि जूली २ यांसारख्या अनेक चित्रपटांची निर्मिती केली. विशेषतः दिग्दर्शक डेविड धवन यांच्यासोबत त्यांनी अनेक यशस्वी चित्रपट दिले. शोला और शबनम (१९९२) आणि आंखें (१९९३) या चित्रपटांना प्रेक्षकांचा मोठा प्रतिसाद मिळाला होता.

चित्रपट निर्मितीबरोबरच निहलानी यांनी उद्योग संघटनांमध्येही महत्त्वाची भूमिका बजावली. त्यांनी असोसिएशन ऑफ पिक्चर्स अँड टीव्ही प्रोग्राम प्रोड्युसर्स या संस्थेचे तब्बल २९ वर्षे अध्यक्षपद भूषविले होते.

त्यांच्या पश्चात पत्नी नीता, तसेच विशाल, दीपेश आणि चिराग हे तीन पुत्र असा परिवार आहे. त्यांच्या निधनाने हिंदी चित्रपटसृष्टीतील एका महत्त्वपूर्ण पर्वाचा अंत झाल्याची भावना व्यक्त केली जात आहे.