शिरूर : शिरूर तालुक्यातील सरदवाडी गावात मध्यरात्रीच्या सुमारास एक धक्कादायक घटना घडली असून घरासमोरून उभी ठेवलेली वॅगनर कार अज्ञात चोरट्याने लंपास केल्याची तक्रार नोंदविण्यात आली आहे. शिरूर पोलिस स्टेशन हद्दीत टु व्हिलर, फोर व्हीलर गाड्या चोऱ्यांचे प्रमाण अधिक वाढले असून शिरूर शहरासह तालुक्यात खळबळ उडाली असून स्थानिक नागरिकांमध्ये भीतीचे वातावरण निर्माण झाले आहे.

या प्रकरणी सरदवाडी येथील रहिवासी बाळासाहेब शंकर गोरडे (वय ३४ वर्षे ) यांनी शिरूर पोलीस ठाण्यात दिलेल्या तक्रारीवरून अज्ञात चोरट्याविरोधात गुन्हा दाखल करण्यात आला आहे. त्यांच्या फिर्यादीनुसार, दिनांक ८ जुलै रोजी रात्री १० वाजता त्यांनी स्वतःची सिल्व्हर रंगाची वॅगनर कार (MH-02-AK-2675) ही पुणे-हायवेच्या कडेला, स्वतःच्या घरासमोर पार्क करून ठेवली होती. मात्र दुसऱ्या दिवशी ९ जुलै रोजी सकाळी ६ वाजता त्यांनी गाडी तपासली असता ती जागेवरून गायब असल्याचे त्यांच्या लक्षात आले.

घटनेची माहिती मिळताच शिरूर पोलीस ठाण्यात अज्ञात चोरट्याविरोधात गुन्हा दाखल करण्यात आला असून पुढील तपास पोलीस नाईक कळमकर यांच्या मार्गदर्शनाखाली सुरू आहे. पोलिसांकडून सीसीटीव्ही फुटेजची तपासणी करण्यात येत असून चोरट्याचा माग काढण्यासाठी विविध पथकांद्वारे शोधमोहीम हाती घेण्यात आली आहे.

दरम्यान, शिरूर परिसरात मागील काही दिवसांत वाहनचोरीच्या घटनांमध्ये वाढ झाल्याचे निरीक्षण काही नागरिकांनी व्यक्त केले आहे. त्यामुळे स्थानिकांनी आपली वाहने सुरक्षित स्थळी पार्क करावीत तसेच शंकेस्पद हालचाली दिसल्यास तात्काळ पोलिसांशी संपर्क साधावा, असे आवाहन पोलीस प्रशासनाने केले आहे.