Vasant More | Shiv Sena | Sanjay Raut : मनसे पक्षाला रामराम ठोकल्यानंतर वसंत मोरे यांनी वंचित बहुनज आघाडीच्या तिकीटावर लोकसभा निवडणूक लढविली. मात्र यात त्यांचा पराभव झाला. यानंतर त्यांनी काही दिवसांपूर्वी उद्धव ठाकरेंची भेट घेतली. यानंतर आज (दि. ९जुलै) वसंत मोरे यांनी जाहीररित्या उद्धव ठाकरे गटात प्रवेश केला. यावेळी वसंत मोरे यांच्या हातावर शिवबंधन बांधत त्यांचे स्वागत करण्यात आले. यावेळी उद्धव ठाकरेंनी वसंत मोरेंसह शिवसेनेत प्रवेश घेतलेल्या असंख्य कार्यकर्त्यांचे आभार मानले. वसंत मोरेंसोबत मनसेचे १७ शाखाअध्यक्ष, ५ उपविभाग अध्यक्ष, १ शहराध्यक्ष, पर्यावरण सेनेचे अनेक पदाधिकारी, वाहतूक सेनेचे पदाधिकारी, माथाडीचे पदाधिकाऱ्यांनी ठाकरे गटात प्रवेश केला आहे. यावेळी शिवसेना खासदार संजय राऊत यांनी वसंत मोरेंचे फारच अनोख्या पद्धतीने स्वागत केले. संजय राऊत म्हणाले की, “वसंत मोरेंची सुरुवात शिवसेनेतून झाली आहे, ते शिवसैनिक आहेत. त्यामुळे, ते शिवसेनेत येतील याची मला खात्री होती. बऱ्याच दिवसांनी पाऊस आला आहे, आणि पावसासोबत वसंतही फुलला आहे, असे संजय राऊत यांनी म्हणतात उपस्थितांनी टाळ्या वाजवून दाद दिली. संजय राऊत पुढे म्हणाले, “तात्यांची सुरुवात शिवसेनेतून झाली. तात्या हे अधेमध्ये कुठेही गेलेले असले तरी तात्या हे मूळचे शिवसैनिक आहेत आणि आता तो शिवसैनिक मातोश्रीच्या मंदिरात दाखल झालेला आहे. शिवसेना परिवारात ते सहभागी झाले आहेत. तात्या शिवसेनेत आल्याने पुणे, खडकवासला आणि आसपासच्या सर्व परिसरातील शिवसेनेची ताकद वाढणार आहे. उद्धव ठाकरेंना एक चांगला मजबूत असा कार्यकर्ता शिवसैनिक मिळालेला आहे’. असेही संजय राऊतांनी म्हटले. वसंत मोरे म्हणतात, ‘मी मुळचा शिवेसनेचा…’ दरम्यान शिवबंधन बांधून घेत असताना वसंत मोरे यांनी आपल्या भावना व्यक्त केल्या. “मी १६ व्या वर्षापासून शिवसेनेत काम करत आहे. पण १८ वर्ष पूर्ण न झाल्यामुळे पद मिळाले नव्हते. बारावीची परिक्षा उत्तीर्ण होताच १९९२ साली कात्रजमध्ये शिवसेनेचा शाखाप्रमुख झालो होतो. आज माझ्याबरोबर अनेक लोक शिवसेनेत येत आहेत. मी मुळचा शिवेसनेचा असल्यामुळे माझा आज प्रवेश नाही तर मी स्वगृही परतलो आहे”, असे वसंत मोरे म्हणाले.
