मुंबई –  गेल्या वर्षीच्या ‘भौकाल’ या वेबसिरीजने प्रेक्षकांमध्ये खऱ्या अर्थाने दहशत निर्माण केली होती. ही वेबसिरीज प्रेक्षकांना खूप आवडली. आता  ‘भौकाल’चा नवा अध्याय लवकरच प्रेक्षकांना पाहायला मिळणार असल्याची बातमी आहे. रिपोर्ट्सनुसार, जतीन वागळे त्यांच्या ‘भौकाल’ या हिट वेब सीरिजचा एक नवीन अध्याय घेऊन येत आहेत, ज्याचे नाव यावेळी ‘भूचल’ असू शकते.

गेल्या वेळी आयपीएस नवनीत सिकेरा यांच्या जीवनावर आधारित ‘भौकाल’ या वेब सिरीजचे दोन सीझन बनवण्यात आले होते, ज्यामध्ये मोहित रैनाने महत्त्वाची भूमिका साकारली होती. त्याचवेळी,’भौकाल’च्या पुढील भागात प्रेक्षकांना यूपीचे माजी डीजीपी ओपी सिंह यांच्यावर आधारित कथा पाहायला मिळणार असल्याची चर्चा आहे.

‘भूचल’ या वेब सीरिजमध्ये यूपीचे माजी डीजीपी ओपी सिंह यांच्या लखीमपूर खेरीमध्ये पोस्टिंगदरम्यानच्या कथा पाहायला मिळणार आहेत. यासाठी निर्मात्यांनी शहराचे लोकेशनही पाहिल्याचे वृत्त आहे. त्याचवेळी मार्चमध्ये त्याचे शूटिंग सुरू होण्याची शक्यता आहे. गेल्या दोन सीझनमध्ये प्रेक्षकांना वेब सीरिजमध्ये अनेक स्टार्स पाहायला मिळाले. यावेळीही प्रेक्षकांना तीच धमाल पाहायला मिळणार आहे. यावेळी वेब सिरीजमध्ये अनेक दिग्गज कलाकार प्रेक्षकांचे मनोरंजन करू शकतात.

वृत्तानुसार, या क्राईम थ्रिलर मालिकेत अभिनेत्री वाणी कपूर मुख्य भूमिकेत दिसणार आहे. लखनौमधील शूटिंगसाठी जागा आधीच शोधून काढली गेली आहे आणि कलाकारांच्या ऑडिशन्स महिन्यातच होण्याची शक्यता आहे. मात्र, वेब सीरिजचे नाव आणि बाकीच्या स्टारकास्टबद्दल फारशी माहिती समोर आलेली नाही.