Mangesh Kalokhe Death Case : खोपोली येथील मंगेश काळोखे हत्याकांड प्रकरणात नवीन राजकीय वळण घेतलं आहे. खोपोली नगरपरिषदेच्या शिवसेना नगरसेविका मानसी काळोखे यांचे पती मंगेश काळोखे यांची २६ डिसेंबर रोजी दिवसाढवळ्या निर्घृण हत्या झाली होती. या हत्येमागे राजकीय वैर असल्याचा आरोप होत असताना आता आमदार महेंद्र थोरवे यांनी बीड कनेक्शनचा मोठा खुलासा केला आहे. थोरवे यांच्या मते, मुख्य आरोपी रवींद्र (रवी) देवकर याचा बॉडीगार्ड बीड जिल्ह्यातील असून त्याने मंगेश काळोखेवर तब्बल १९ वार केले होते. हा बॉडीगार्ड वाल्मिक कराड आणि धनंजय मुंडे यांच्या गँगशी संबंधित असल्याचा गंभीर आरोप आमदार थोरवे यांनी केला आहे. त्यांनी सोशल मीडियावर व्हायरल झालेल्या फोटोंचा देखील उल्लेख केला आहे, ज्यात देवकरचा बॉडीगार्ड आणि वाल्मिक कराड गँगचे सदस्य एकत्र दिसत आहेत. या हत्याकांडाने संपूर्ण महाराष्ट्र हादरला होता. मंगेश काळोखे हे आमदार महेंद्र थोरवे यांचे कट्टर समर्थक होते. खोपोली नगरपरिषद निवडणुकीत मानसी काळोखे यांनी राष्ट्रवादीच्या उर्मिला देवकर यांचा ७०० हून अधिक मतांनी पराभव केला होता. या पराभवाचा राग आणि राजकीय वैमनस्यातून हा कट रचला गेल्याचा दावा केला जात आहे. पोलिसांनी मुख्य आरोपी रवींद्र देवकर, त्यांचे पुत्र दर्शन आणि धनेश, उर्मिला देवकर यांच्यासह ८-९ जणांना अटक केली आहे. तसेच राष्ट्रवादीचे रायगड जिल्हाध्यक्ष सुधाकर घारे आणि जिल्हा प्रवक्ते भरत भगत यांच्यासह इतरांवर गुन्हा दाखल करण्यात आला आहे. उपमुख्यमंत्री एकनाथ शिंदे यांनी पीडित कुटुंबीयांची भेट घेऊन MCOCA लागू करून फास्ट-ट्रॅक कोर्टात खटला चालवण्याची हमी दिली आहे. आमदार महेंद्र थोरवे यांनी खोपोली पोलीस ठाण्यावर कॅंडल मार्च आणि ठिय्या आंदोलनाचा इशारा दिला आहे. सर्व आरोपींना लवकरात लवकर अटक करण्याची मागणी ते करत आहेत. या प्रकरणात बीड कनेक्शनमुळे राजकीय वातावरण आणखी तापलं आहे.
