Vaduj Medical Strike – शासनाने ऑनलाइन औषध विक्री तातडीने बंद करावी या मागणीसाठी वडूज शहरासह खटाव तालुक्यातील सर्व मेडीकल व्यावसायिकांनी कडकडीत बंद पाळून काळया फिती लावून तहसीलदार कार्यालवर मूक मोर्चा काढला. केंद सरकारने जी. एस. आर. अंतर्गत ऑनलाइन औषध विक्री संदर्भात परिपत्रक जारी केले आहे. मात्र या परिपत्रकाचे अद्याप कायद्यात रूपांतर झाले नाही. त्यामुळे देशभरात मोठ्या प्रमाणात ऑनलाईन औषध विक्री सुरू आहे. या संदर्भात दिल्ली उच्च न्यायालयाने ऑनलाइन औषध विक्रीला स्थगिती दिली आहे. मात्र या आदेशाची सरकार कडून प्रभावी अंमलबजावणी केली जात नाही. याचे निषेधार्थ अखिल भारतीय औषध विक्रेता संघटनेने आजचा बंद पुकारला होता. त्याचाच भाग म्हणून खटाव तालुका केमिस्ट व ड्रडिस्ट असोसिएनच्या वतीने सर्वत्र कडकडीत बंद पाळला. छ. संभाजी चौकातून प्रारंभ झालेला मोर्चा शहा पेट्रोल पंप, छ. शिवाजी महाराज चौक, एस. टी. बस स्थानक मार्गे तहसीलदार कार्यालयात आल्यानंतर त्या ठिकाणी नायब तहसीलदार महेश माने यांना मागण्यांचे निवेदन देऊन चर्चा करण्यात आली. या मोर्चात जिल्हा खजिनदार श्रीकांत देशमुख, ज्येष्ठ मार्गदर्शक सुधीर शहा,डॉ. संतोष गोडसे, अतूल इनादमदार, दत्तात्रय निकम, विजय माने, श्री. पाटील सर आदींसह तालुक्यातील गावोगावचे मेडिकल व्यावसायिक व महिलांनी सहभाग घेतला होता. नायब तहसीलदार श्री. गायकवाड यांनी मेडीकल व्यावसायिकांच्या मागण्यांसंदर्भात तातडीने वरिष्ठांशी संपर्क साधल्याचे सांगितले.
