Tukaram Mundhe : अन्न व औषध प्रशासन (FDA) विभागाचे आयुक्त तुकाराम मुंढे यांनी भेसळखोर आणि नियमभंग करणाऱ्यांविरोधातील मोहीम अधिक तीव्र केली असून आता त्यांचा मोर्चा वडापाव, समोसा आणि इतर खाद्यपदार्थ विक्रेत्यांकडे वळला आहे. राज्यभरातील विक्रेत्यांना खाद्यपदार्थ वर्तमानपत्राच्या कागदात गुंडाळून विकू नयेत, अशा स्पष्ट सूचना विभागाकडून देण्यात आल्या आहेत. अन्यथा संबंधित विक्रेत्यांवर कारवाई केली जाणार असल्याचा इशारा तुकाराम मुंढे यांनी दिला आहे.

बाजारपेठेत वडापाव, समोसा, भजीपाव यांसारखे पदार्थ वर्तमानपत्रात बांधून देण्याची पद्धत सर्वत्र दिसून येते. मात्र, वर्तमानपत्राच्या शाईतील शिसे, झिंक आणि कॅडमियमसारखे घातक घटक आरोग्यास अपायकारक ठरू शकतात. त्यामुळे अशा प्रकारे खाद्यपदार्थ विकण्यावर आधीपासूनच बंदी असली तरी आता या नियमाची काटेकोर अंमलबजावणी करण्याचे संकेत FDA ने दिले आहेत.

तुकाराम मुंढे यांनी पदभार स्वीकारल्यानंतर राज्यभरात भेसळीविरोधात मोठ्या प्रमाणावर कारवाया केल्या आहेत. अनेक ठिकाणी धाडी टाकून भेसळीचा माल जप्त करण्यात आला असून संबंधितांवर गुन्हे दाखल करण्यात आले आहेत. आता खाद्यपदार्थांच्या पॅकिंगमधील नियमभंग करणारे विक्रेतेही FDA च्या रडारवर आले आहेत.

या निर्णयामुळे वडापाव, समोसा, भजीपाव, सॅंडविच तसेच इतर खाद्यपदार्थ विक्रेत्यांना वर्तमानपत्राला पर्याय शोधावा लागणार आहे. सध्या अनेक ठिकाणी बटर पेपर, फूड-ग्रेड पेपर किंवा सिल्व्हर फॉईलचा वापर केला जात असून त्यालाच प्राधान्य देण्याचे आवाहन करण्यात आले आहे.

हेही वाचा : Mamata Banerjee : ममता बॅनर्जी दिल्लीच्या राजकारणात जाणार? चर्चांना उधाण; अखेर युसूफ पठाणने व्हिडिओ शेअर करत स्पष्टचं सांगितलं

FDA च्या या निर्णयामुळे खाद्यसुरक्षेच्या नियमांचे पालन अधिक कठोर होण्याची शक्यता असून नियमांचे उल्लंघन करणाऱ्यांवर कारवाई अटळ मानली जात आहे.

तुकाराम मुढेंकडून मोठी कारवाई

आयएएस अधिकारी तुकाराम मुंढे यांनी अन्न व औषध प्रशासन विभागाचा पदभार स्वीकारल्यापासून राज्यात कारवाईचा धडाका सुरू केला आहे. यामुळे भेसळ करणाऱ्यांचे दाबे दणाणले आहेत.

नुकत्याच एका कारवाईत भिवंडी, पालघर आणि मुंबई येथील तीन आस्थापनांमधून एकूण ८१ लक्ष किमतीचा औषध साठा जप्त करण्यात आला असून १ कोटी ३५ लाख रुपये किमतीचा सर्जिकल ग्लोव्हज साठा गुणवत्ता चाचणीसाठी प्रतिबंधित करण्यात आला आहे.

अन्न व औषध प्रशासन आयुक्त तुकाराम मुंढे यांच्या निर्देशानुसार तपासणी मोहीम कारवाईत औषधे व सौंदर्य प्रसाधने कायदा १९४० आणि नियमांचा भंग करणाऱ्या कंपन्यांविरोधात कारवाई करण्यात आली आहे.

हेही वाचा : Amrita Rao : रेडिओवरून केलं प्रपोज, 7 वर्षे डेटिंग अन् मग लग्न; अमृता रावची भन्नाट लव्ह स्टोरी