V. K. Saxena : दिल्लीचे उपराज्यपाल व्ही. के. सक्सेना (V. K. Saxena) यांनी सोमवारी दिल्ली पोलीस दलात माजी अग्निवीरांच्या भरतीसाठी महत्त्वपूर्ण घोषणा केली. आता दिल्ली पोलिसांच्या पुरुष कॉन्स्टेबल (कार्यकारी) पदाच्या थेट भरतीत माजी अग्निवीरांसाठी 20 टक्के जागा राखीव असतील, असे ते म्हणाले. उपराज्यपालांनी (V. K. Saxena) दिल्ली पोलीस (नियुक्ती आणि भरती) नियम, १९८० मध्ये सुधारणा करण्यास मंजुरी दिली असून या नवीन तरतुदींनुसार, माजी अग्निवीरांना केवळ आरक्षणच नाही, तर शारीरिक कार्यक्षमता चाचणीतून पूर्ण सूट देण्यात आली आहे. तसेच, निर्धारित उच्च वयोमर्यादेत सरसकट ३ वर्षांची सूट मिळेल. विशेष म्हणजे, अग्निवीर योजनेच्या पहिल्या तुकडीतील उमेदवारांना २५ वर्षांच्या वयोमर्यादेपेक्षा ५ वर्षांपर्यंतची अधिक सवलत दिली जाणार आहे. सध्या दिल्ली पोलिसात पुरुष कॉन्स्टेबलची ४२,४५१ मंजूर पदे आहेत. या निर्णयामुळे लष्करी प्रशिक्षण घेतलेल्या अनुभवी तरुणांना कायदा आणि सुव्यवस्था राखण्याच्या कामात सहज सामावून घेता येईल, असे अधिकृत निवेदनात म्हटले आहे. अग्निवीर म्हणून चार वर्षांची सेवा पूर्ण करणाऱ्या तरुणांना नागरी सेवेत करिअर करण्याची ही मोठी संधी ठरणार आहे.
