US Strikes Venezuela: एकीकडे देशातील ९० टक्के जनता भुकेने व्याकुळ झालेली आहे आणि लोक कचऱ्यात अन्न शोधत आहेत, तर दुसरीकडे त्याच देशावर जगातील महासत्ता असलेल्या अमेरिकेने ड्रोन आणि रॉकेट डागले आहेत. व्हेनेझुएलाची राजधानी काराकासवर झालेल्या या अमेरिकन हल्ल्यामुळे जगभरात खळबळ उडाली आहे. अमेरिका आणि व्हेनेझुएला यांच्यातील हा संघर्ष जुनाच असला, तरी सध्याच्या कारवाईमुळे या गरीब देशातील परिस्थिती अधिकच भीषण झाली आहे. अमेरिकेचे राष्ट्राध्यक्ष डोनाल्ड ट्रम्प यांनी या कारवाईचे समर्थन करताना म्हटले आहे की, ही लढाई अंमली पदार्थांच्या तस्करीविरुद्ध म्हणजेच ‘नार्को-टेररिझम’ विरुद्ध आहे. अमेरिकेचा असा आरोप आहे की व्हेनेझुएलाचे सरकार ड्रग्ज माफियांच्या पाठीशी उभे आहे. मात्र, व्हेनेझुएलाचे राष्ट्राध्यक्ष निकोलस मादुरो यांनी हे आरोप साफ फेटाळून लावले आहेत. मादुरो यांच्या मते, अमेरिकेला अंमली पदार्थांची चिंता नाही, तर त्यांना व्हेनेझुएलाच्या जमिनीखाली दडलेल्या अफाट नैसर्गिक संपत्तीवर कब्जा करायचा आहे आणि तिथली सत्ता बदलून स्वतःच्या मर्जीतले सरकार आणायचे आहे. व्हेनेझुएलाच्या या वादाच्या केंद्रस्थानी असलेला खरा खजिना म्हणजे तिथे असलेला कच्चा तेलाचा साठा. आकडेवारीनुसार, व्हेनेझुएलाकडे जगातील सर्वात मोठा तेल साठा आहे जो सौदी अरेबियापेक्षाही अधिक आहे. या देशाच्या अर्थव्यवस्थेचा ९० टक्के डोलारा केवळ तेलावर अवलंबून आहे. तेलाशिवाय येथे नैसर्गिक वायू, सोने आणि कोळशाचे मोठे साठे आहेत. अमेरिकेला स्वतःसाठी या कच्च्या तेलाची गरज आहे आणि व्हेनेझुएला भौगोलिकदृष्ट्या अमेरिकेच्या जवळ असल्याने तिथून तेल मिळवणे सोपे पडते. तज्ज्ञांचे असे मत आहे की, जर व्हेनेझुएलामध्ये अमेरिकेला अनुकूल असलेले सरकार सत्तेवर आले, तर या तेल साठ्यांवर अमेरिकन कंपन्यांचे नियंत्रण येईल. यामुळे जागतिक बाजारात अमेरिकेचा दबदबा वाढेल आणि रशियासारख्या देशांचे महत्त्व कमी होईल. या मोठ्या राजकीय संघर्षात मात्र सामान्य जनता भरडली जात आहे. ज्या देशात कधी पेट्रोल पाण्यापेक्षा स्वस्त मिळत होते, तिथे आज लोकांना अन्नासाठी वणवण करावी लागत आहे. बेरोजगारी आणि अंधारात बुडालेल्या या देशाचे भविष्य आता जागतिक राजकारणाच्या खेळात अडकले आहे. व्हेनेझुएलावर मोठा हल्ला, राष्ट्राध्यक्षाला पत्नीसह घेतले ताब्यात – दरम्यान, अमेरिकेने काराकासमध्ये किमान सात शक्तिशाली स्फोट घडवून आणले. यामध्ये ड्रोन, क्षेपणास्त्रे आणि रॉकेटचा वापर करण्यात आला. या हल्ल्यात व्हेनेझुएलाचे लष्करी तळ, नौदल तळ आणि महत्त्वाच्या सरकारी इमारतींना लक्ष्य करण्यात आले आहे. अमेरिकेचे राष्ट्राध्यक्ष डोनाल्ड ट्रम्प यांनी दावा केला आहे की, या मोहिमेत व्हेनेझुएलाचे राष्ट्राध्यक्ष निकोलस मादुरो आणि त्यांची पत्नी सिलीया फ्लोरेस यांना ताब्यात घेऊन देशाबाहेर नेण्यात आले आहे. त्यांच्यावर ‘नार्को-टेररिझम’ (अमली पदार्थांची तस्करी) चे आरोप लावण्यात येणार आहेत. या हल्ल्यामुळे काराकासमध्ये पूर्णपणे ‘ब्लॅकआउट’ (वीजपुरवठा खंडित) झाला असून शहरात धुराचे लोट दिसत आहेत. व्हेनेझुएला सरकारने याला ‘साम्राज्यवादी हल्ला’ म्हटले असून देशात आणीबाणी घोषित केली आहे. अमेरिकेने अमली पदार्थांच्या तस्करीविरुद्धचे युद्ध असल्याचे म्हटले असले, तरी जागतिक स्तरावर यावरून मोठे राजकीय वाद निर्माण होण्याची शक्यता आहे.
