US-Israel-Iran War : अमेरिका-इराण यांच्यातील चर्चा निष्फठ ठरल्यानंतर हा तणाव आता एका अत्यंत धोकादायक वळणावर पोहोचला आहे. तसेच अमेरिकेचे अध्यक्ष डोनाल्ड ट्रम्प यांनी पुन्हा आक्रमक पवित्रा घेतला असून होर्मूझ सामुद्रधुनी बंद करण्यासाठी अमेरिकेच्या नौदलाकडून हल्ले केले जाणार असल्याचा इशारा दिला आहे. होर्मूझच्या सामुद्रधुनीमध्ये जहाजे प्रवेश देखील करू नयेत आणि तेथून बाहेरही पडू नयेत, यासाठी ही नाकाबंदी केली जाणार असल्याचे त्यांनी म्हटले आहे. यामुळे जागतिक तेल पुरवठा धोक्यात आला आहे. पाकिस्तानमध्ये अमेरिका आणि इराण यांच्यात सुरू असलेली उच्चस्तरीय शांतता चर्चा रविवारी कोणत्याही कराराशिवाय संपुष्टात आली. अमेरिकेचे उपराष्ट्राध्यक्ष जे. डी. व्हान्स हे इराणशी तोडगा काढण्यात अपयशी ठरल्यानंतर ट्रम्प यांनी तातडीने नाकेबंदीचा निर्णय जाहीर केला. इराणचे युद्ध सुरू होण्यापुर्वी जगभरातील तेल वाहतुकीच्या २० टक्के वाहतूक होर्मूझच्या सामुद्रधुनीमधून होत होती. संघर्षाच्यावेळी इराणच्या हातात असलेल्या आर्थिक लाभाचा स्रोत काढून घेण्याच्या हेतूने महत्वाचा सागरी मार्ग असलेल्या होर्मूझच्या सामुद्रधुनीवर आपले नियंत्रण प्रस्थापित करण्याचा प्रयत्न ट्रम्प यांनी सुरू केला आहे. ज्या जहाजांनी इराणला होर्मूझच्या वापराबद्दल टोल दिला आहे, अशा आंतरराष्ट्रीय जलक्षेत्रातील प्रत्येक जहाजाचा शोध घेऊन ते रोखण्याची सूचना आपण अमेरिकेच्या नौदलाला केली आहे. बेकायदेशीर टोल देणाऱ्या कोणालाही या मार्गाने सुखरुपपणे जाता येणार नाही, असेही त्यांनी म्हटले आहे. इराणला योग्यवेळी संपवणय्साठी अमेरिका सज्ज आहे, असेही ट्रम्प यांनी म्हटले आहे. अण्वस्त्रे मिळवण्याची इराणची महत्वाकांक्षा हीच हे युद्ध समाप्त करण्यात आलेल्या अपयशाचे मूळ कारण आहे, असे त्यांनी जोर देऊन म्हटले आहे.
