US-Iran Ceasefire: अमेरिका- इराणमध्ये ४५ दिवसांची होणार शस्त्रसंधी ? ; ट्रम्प यांच्या धमकीनंतर लगेचच हा धक्कादायक अहवाल समोर

US-Iran Ceasefire: अमेरिकेचे अध्यक्ष डोनाल्ड ट्रम्प यांनी इराणला मंगळवारपर्यंतचा अंतिम इशारा दिला आहे. जर तेहरानने होर्मुझची सामुद्रधुनी खुली केली नाही, तर इराणला उद्ध्वस्त करण्याची आणि तेथील तेलसंपदा जप्त करण्याची धमकी त्यांनी दिली आहे.

दरम्यान, अमेरिका आणि इराण ४५ दिवसांच्या युद्धविरामावर वाटाघाटी करत असल्याचा अहवाल समोर आला आहे. राजकीय प्रयत्नांशी परिचित असलेल्या चार सूत्रांचा हवाला देत ‘ॲक्सिऑस’ने हा दावा केला आहे.

या अहवालात म्हटले आहे की, पाकिस्तान, इजिप्त आणि तुर्कीमार्फत वाटाघाटी होत असून, अमेरिकेचे राजदूत स्टीव्ह विटकॉफ आणि इराणचे परराष्ट्र मंत्री अब्बास अराघची यांच्यात गोपनीय चर्चा होत आहे.

४८ तासांत इराणसोबत करार होणार का? US-Iran Ceasefire:

या अहवालात पुढे म्हटले आहे की, पुढील ४८ तासांत करार होण्याची शक्यता कमी आहे. मात्र, युद्धाची पुढील तीव्रता रोखण्यासाठी हा एक ‘शेवटचा प्रयत्न’ मानला जात आहे.

ट्रम्प यांनी इराणची अंतिम मुदत वाढवली का?

अमेरिकेचे अध्यक्ष डोनाल्ड ट्रम्प यांनी रविवारी इराणला होर्मुझची सामुद्रधुनी पुन्हा उघडण्यासाठी करार करण्याकरिता दिलेली मुदत २४ तासांनी वाढवली, अन्यथा त्यांच्या पायाभूत सुविधांवर हल्ला होईल, असे सांगितले. ‘ट्रुथ सोशल’वरील एका पोस्टमध्ये ट्रम्प यांनी लिहिले, “मंगळवार, रात्री ८ वाजता ईस्टर्न टाईम.”

US-Iran Ceasefire:

ही पोस्ट त्यांच्या धमकीनंतर काही तासांतच आली, “मंगळवारी इराणमध्ये ‘पॉवर प्लांट डे’ आणि ‘ब्रिज डे’ एकाच वेळी साजरा केला जाईल. असे यापूर्वी कधीही घडले नाही!!! तुम्ही वेड्या लोकांनो, होर्मुझची सामुद्रधुनी उघडा, नाहीतर तुम्ही नरकात जाल—फक्त बघा.”

इराणला पुन्हा उभं राहायला २० वर्षे लागतील US-Iran Ceasefire:

रविवारी ‘वॉल स्ट्रीट जर्नल’शी बोलताना ट्रम्प म्हणाले, “आमची भूमिका खूप मजबूत आहे, आणि त्या देशाची पुनर्बांधणी करण्यासाठी २० वर्षे लागतील. जर ते नशीबवान असतील, जर त्यांचा देश टिकला. आणि जर त्यांनी मंगळवार संध्याकाळपर्यंत काही केले नाही, तर त्यांच्याकडे एकही वीज प्रकल्प शिल्लक राहणार नाही आणि एकही पूल शिल्लक राहणार नाही.”

ट्रम्प यांच्या धमक्यांवर इराणने काय म्हटले?

इराणचे संसद अध्यक्ष एम.बी. गालिबाफ यांनी इराणच्या पायाभूत सुविधांना लक्ष्य करण्याच्या ट्रम्प यांच्या धमक्या फेटाळून लावल्या. ते म्हणाले, “युद्धगुन्ह्यांनी काहीही साध्य होणार नाही. इराणी लोकांच्या हक्कांचा आदर करणे आणि हा धोकादायक खेळ संपवणे हाच एकमेव खरा उपाय आहे.”