Upendra Limaye : मराठी चित्रपटसृष्टीत काही चित्रपट असे असतात, जे केवळ मनोरंजन करत नाहीत, तर समाजातील वास्तवावरही भाष्य करतात. असाच एक वेगळ्या धाटणीचा आणि आशयघन चित्रपट म्हणजे ‘जोगवा’. २००९ मध्ये प्रदर्शित झालेल्या या चित्रपटाने मराठी सिनेसृष्टीतील साचेबद्ध कथानकांना छेद देत प्रेक्षकांसमोर एक संवेदनशील विषय मांडला.

या चित्रपटात अभिनेता उपेंद्र लिमये यांनी साकारलेली तायप्पा ही व्यक्तिरेखा विशेष गाजली. त्यांच्या अभिनयाचे सर्वत्र कौतुक झाले आणि त्यांना राष्ट्रीय पुरस्कारानेही गौरवण्यात आले. विशेष म्हणजे, चित्रपटाच्या शूटिंगदरम्यानच दिग्दर्शक राजीव पाटील यांनी उपेंद्र लिमये यांना राष्ट्रीय पुरस्कार मिळणार असल्याची भविष्यवाणी केली होती.

‘जोगवा’ चित्रपटात तायप्पा आणि सुली या दोघांची प्रेमकहाणी दाखवण्यात आली होती. अभिनेता उपेंद्र लिमये यांनी तायप्पा, तर अभिनेत्री मुक्ता बर्वे यांनी सुलीची भूमिका साकारली होती. या दोघांच्या आयुष्यातील संघर्षातून चित्रपटाने समाजातील रूढी, परंपरा आणि अंधश्रद्धांवर भाष्य केले. या चित्रपटाला प्रेक्षकांची मोठी पसंती मिळाली तसेच अनेक पुरस्कारांनीही गौरवण्यात आले.

दिग्दर्शक राजीव पाटील यांची भविष्यवाणी ठरली खरी!

नुकत्याच एका मुलाखतीत उपेंद्र लिमये यांनी ‘जोगवा’ चित्रपटाच्या शूटिंगदरम्यानच्या अनेक आठवणींना उजाळा दिला. तायप्पा ही व्यक्तिरेखा घेऊन दिग्दर्शक राजीव पाटील त्यांच्याकडे आले होते. उपेंद्र यांनी या भूमिकेसाठी होकार दिल्यानंतर चित्रपटाच्या शूटिंगला सुरुवात झाली. चित्रपटाचे शूटिंग ठरलेल्या नियोजनानुसार होत असे. मात्र, काही प्रसंगांमध्ये उपेंद्र स्वतःची मतेही दिग्दर्शकांसमोर मांडत असत.

चित्रपटातील अभिनयाबाबत बोलताना उपेंद्र यांनी सांगितले की, प्रत्येक सीनमध्ये चेहऱ्यावरील भाव, डोळ्यांतून व्यक्त होणाऱ्या भावना आणि व्यक्तिरेखेची मानसिकता याबाबत सुरुवातीला चर्चा झाली होती. मात्र, प्रत्यक्ष शूटिंगदरम्यान अनेकदा थेट सीन शूट केला जायचा. काही प्रसंगांमध्ये त्यांनी स्वतःच्या कल्पनाही मांडल्या आणि त्यावर दिग्दर्शकांसोबत चर्चा केली.

‘उप्या, तुला यावर्षी राष्ट्रीय पुरस्कार मिळणार!’

‘जोगवा’ चित्रपटातील ‘लल्लाटी भंडार’ या गाण्याच्या चित्रीकरणादरम्यानचा एक खास किस्सा उपेंद्र लिमये यांनी सांगितला. या गाण्यातील एका क्लोजअप शॉटमध्ये ते तुणतुणे वाजवताना दिसतात. हा शॉट पूर्ण झाल्यानंतर दिग्दर्शक राजीव पाटील यांनी त्यांच्याकडे पाहून, ‘उप्या, तुला यावर्षीचा राष्ट्रीय पुरस्कार मिळणार,’ असे म्हटले होते.

विशेष म्हणजे, राजीव पाटील यांनी वर्तवलेला हा अंदाज खरा ठरला. ‘जोगवा’ चित्रपटातील दमदार अभिनयासाठी उपेंद्र लिमये यांना २००९ सालचा सर्वोत्कृष्ट अभिनेत्याचा राष्ट्रीय पुरस्कार जाहीर झाला. २०१० मध्ये त्यांना हा पुरस्कार प्रदान करण्यात आला.

उपेंद्र लिमये यांच्या कारकिर्दीतील ‘जोगवा’ हा चित्रपट आजही एक महत्त्वाचा टप्पा मानला जातो. तायप्पा या व्यक्तिरेखेला त्यांनी दिलेला जिवंतपणा आणि अभिनयातील सहजता यामुळे ही भूमिका प्रेक्षकांच्या मनात कायमची घर करून राहिली.

Shirur : शिरुरमध्ये दरोडेखोरांची दहशत; ८० वर्षीय वृद्धेला रॉडने मारहाण, सशस्त्र दरोड्याने खळबळ