पाटणा- केंद्रीय गृह राज्यमंत्री नित्यानंद राय यांनी सोमवारी पाटणा येथे माध्यमांशी बोलताना गृहमंत्री अमित शहा यांचे कौतुक केले. तसेच यावेळी त्यांनी लालू प्रसाद यादव आणि तेजस्वी यादव यांच्यावर जोरदार हल्लाबोल केला. बिहारमध्ये सर्वत्र विकास होत आहे, पण ते (तेजस्वी यादव) हा विकास पाहू शकत नाहीत. जर तुम्हाला दिसत नसेल तर तुमच्या डोळ्यांवर उपचार करा. जर तुम्हाला जनतेचा आवाज ऐकू येत नसेल तर तुमचे कान उघडे करा असे राय यांनी म्हटले आहे.

मंत्री म्हणाले, जंगलराज पक्षाच्या लोकांना विकासात रस नाही. लालू यादव, त्यांचा मुलगा आणि कम्युनिस्ट पक्षाचे लोक म्हणतात की बिहारमध्ये विकास होत नाही. मी अशा नेत्यांना सांगू इच्छितो की त्यांनी चष्मा काढून पाहावे आणि कानांनी लोकांचा आवाज ऐकावा. त्यांना दिसत नाही आणि ऐकू येत नाही, ते बहिरे आणि मुके आहेत.

केंद्र सरकार आणि बिहारच्या नितीश सरकारचे कौतुक करताना नित्यानंद राय म्हणाले की, गृहमंत्र्यांनी गोपाळगंजच्या सभेत २० वर्षांत किती विकास झाला आहे याचा हिशोब दिला. लालूंच्या काळात बिहारमध्ये रस्ते नव्हते, आता रस्ते आहेत. पाटणा-सासाराम आणि आरा मार्गे चार-लेन कॉरिडॉर असलेल्या ग्रीनफिल्ड आणि ब्राउनफिल्डच्या बांधकामाला मंजुरी देण्यात आली. पूर्वी बिहारमध्ये शाळा मोडकळीस आल्या होत्या, वीज नव्हती, नळांमध्ये पाणी नव्हते, गुंडगिरी होती, जंगलराज होते, रोजगार नव्हता आणि स्थलांतर होत होते.

नित्यानंद राय पुढे म्हणाले की, देशातील २५ कोटी लोक दारिद्र्यरेषेतून बाहेर पडले आहेत आणि बिहारमध्येही लाखो लोक दारिद्र्यरेषेतून बाहेर आले आहेत. बिहारमध्ये रोजगाराच्या संधी उपलब्ध झाल्या आहेत. जर विरोधकांना बिहारचा विकास दिसत नसेल तर त्यांनी त्यांच्या डोळ्यांचा उपचार चांगल्या डॉक्टरांकडून करून घ्यावा आणि जर त्यांना ऐकू येत नसेल तर त्यांनी त्यांच्या कानांचा उपचार करावा.