Sanjay Dutt:  अभिनेता संजय दत्तने शेखर सुमन यांच्या ‘शेखर टुनाइट’ या कार्यक्रमात हजेरी लावली होती. या शो दरम्यान संजय दत्तला जर तो पाच मिनिटांसाठी भारताचा पंतप्रधान झाला तर, अशी कल्पना दिली गेली होती. ज्यावर संजय दत्तने मुन्नाभाई स्टाईल भाषण करत देशवासीयांना संदेश दिला.

इतकेच काय तर अमेरिकेचे राष्ट्राध्यक्ष डोनाल्ड ट्रम्प यांच्यावरही निशाणा साधला. संजय दत्त यांनी नेत्यांचे फोटो, परदेश दौरे आणि ट्रम्प यांच्या टॅरिफ पॉलिसीवर ‘गांधीगिरी’चा मार्ग अवलंबण्याचे आवाहन केले.

संजय दत्तने ५ मिनिटांसाठी स्वतःला देशाचे पंतप्रधान मानून जनतेला एक संदेश दिला. त्याने  मुन्नाभाईच्या शैलीत हा संदेश देताना म्हटले, “माझ्या प्रिय देशवासियांनो, आज तुमचा पीएम बनून मला खूप आनंद झाला आहे. एवढा मोठा देश आहे, एवढे सगळे लोक आहेत आणि आता या सर्वांची जबाबदारी माझ्यावर आहे. पण तुम्ही लोकांनी अजिबात टेन्शन घ्यायचं नाही. मी हा आनंद साजरा करण्यासाठी परदेशात जाणार नाही. मी इथेच राहणारे, तुमच्या मध्ये नाहीतर पीएम आणि जनतेमध्ये कनेक्शन कसं तयार होणार?”

 

View this post on Instagram

 

पुढे संजय दत्त म्हणाले, “मला पंतप्रधान बनून देशासाठी खूप काही करण्याची संधी मिळाली आहे, तर मी अजून एक काम करेन. जिथे जिथे पीएमचा फोटो लावला आहे ना, तो मी काढून टाकेन. देशाला देशाचा फोटो दिसला पाहिजे. जिथे स्वतःचा फोटो लावावासा वाटेल, तिथे गांधीजींचा फोटो लावायचा. म्हणजे गांधीजींचे विचार दिसणे जास्त गरजेचे आहे, माझा फोटो बघून जनता काय करणार?” दरम्यान, सार्वजनिक ठिकाणी नेत्यांच्या फोटो लावण्याच्या ट्रेंडवर संजय दत्तने टोमणा मारला आहे.

चौथ्या माकडाचीसुद्धा गरज

संजय दत्त पुढे म्हणाले, “मी गांधीजींना खूप मानतो. गांधीजींचे तीन माकड सर्वांनाच माहिती आहेत- वाईट बघू नका, वाईट ऐकू नका आणि वाईट बोलू नका. पण आज एका चौथ्या माकडाचीसुद्धा गरज आहे. जर कोणी वाईट घडताना बघेल, तर ते दुरुस्त कोण करणार? तिन्ही माकडं जर डोळे, कान आणि तोंड बंद करून बसली, तर देश कसा चालणार?”

‘देशात पूर्वीसारखी शांतता जाणवत नाही’

संजय दत्त म्हणाले, “या देशातील लोक खूप प्रेमळ आहेत. येथे शांतता असायला हवी. आता मला या देशात पूर्वीसारखी शांतता जाणवत नाही. आपण भारतीय मोठ्या मनाचे लोक आहोत. आपण सर्वांचे मोकळ्या मनाने स्वागत करतो. आपण खूप काही दिले आहे आणि आपण नेहमी असेच राहिले पाहिजे. शांतता प्रेमाने निर्माण होते आणि प्रेम हे ‘गांधीगिरी’तून येते.”

 

View this post on Instagram

 

डोनाल्ड ट्रम्प यांच्याबाबत संजय दत्त काय म्हणाले?

संजय दत्तने डोनाल्ड ट्रम्प यांच्या टॅरिफ पॉलिसीवरही प्रतिक्रिया दिली. ते म्हणाले, “ट्रम्प मामू संपूर्ण जगाला आऊट ऑफ फ्रेम करायच्या मागे लागलेत. त्यांना विनम्रपणे सांगेन, बघा ट्रम्प मामू हल्ले वैगरे नाही करायचे. जगात आधीच खूप मिसाइल्स झाली आहेत. आता थोडे प्रेमसुद्धा एक्सपोर्ट करायला हवे. कुठे क्षेपणास्त्र पाठवावेसे वाटले, तर आधी फुलांचा गुच्छ पाठवा. कोणाला धमकी द्यावीशी वाटली ना, तर त्याला फोन करून घरी बोलवायचे आणि चहा पिता पिता प्रश्न सोडवा.” डोनाल्ड ट्रम्प यांच्या आक्रमक भूमिकेवरुन संजय दत्तने हा टोला लगावला आहे.

संजय दत्तने २००६ मध्ये ‘लगे रहो मुन्ना भाई’ या चित्रपटात काम केले होते. या चित्रपटातून त्यांनी ‘गांधीगिरी’चा संदेश दिला होता. राजकुमार हिरानी यांनी या चित्रपटाचे दिग्दर्शन केले होते. या चित्रपटाला प्रेक्षकांनी भरभरून प्रतिसाद दिला होता. चित्रपटात अर्शद वारसी देखील मुख्य भूमिकेत होता.

हेही वाचा: 

Baramati Crime News: बाबुर्डी दुहेरी हत्याकांडाचा सात दिवसांत छडा; चुलत नातूच निघाला मारेकरी