Ashok Kharat : महिला लैंगिक अत्याचारातील आरोपी भोंदूबाबा अशोक खरातसोबत अनेक बड्या नेत्यांचे फोटो समोर आल्यानंतर राजकीय वर्तुळात खळबळ उडाली आहे. यावरूनच आमदार दीपक केसरकर यांनी अशोक खरातसोबतच्या असलेल्या फोटोबाबत व्हिडिओच्या माध्यमातून खुलासा केला आहे. अशोक खरातसमवेत उपमुख्यमंत्री एकनाथ शिंदे, खासदार श्रीकांत शिंदे आणि केसरकरांचा एकत्र असल्याचा फोटो सध्या सोशल मीडियावर व्हायरल झाला. यावर केसरकर यांनी व्हिडिओद्वारे म्हटले की, मी मुंबईच्या बाहेर असल्याने या प्रकरणावर काही खुलासे करु शकलो नाही. त्यामुळे व्हिडिओच्या माध्यमातून मी माझी भूमिका मांडत आहे. ईशान्येश्वर मंदिराच्या एका रस्ता बनविण्यासाठी खरात एकनाथ शिंदे यांना भेटण्यासाठी आले होते, तेव्हाच माझी आणि त्यांची ओळख झाली. त्यावेळचा तो फोटो आहे. Ashok Kharat त्यांचा एस्ट्रॉनॉमीमध्ये चांगला अभ्यास असल्याने माझ्यासारख्या अनेक लोकांची त्यांच्याशी ओळख आहे. अशोक खरातचे कृत्य घृणास्पद आहे, त्याचा निषेध करतो. मात्र, त्याच्या ओळखीच्या लोकांना यात गुंतवणे आणि फोटो प्रसिद्ध करणे ही चुकीची बाब आहे. माझ्यासारख्या अनेक राजकीय लोकांचे केवळ फोटो आले म्हणून आरोप करणे हे चुकीचे आहे. तसेच, माझ्या ऑफिसमध्ये तो कधीच आला नाही, त्यामुळे तो माझे खाते चालवत होता असेही म्हणणे चुकीचे आहे, असे केसरकर यांनी स्पष्टीकरणात म्हटले आहे.
