Uddhav Thackeray vs Eknath Shinde : शिवसेना आमदार अपात्रता सुनावणी सुरू असून आज दोन सत्रांत सुनावणी पार पडली आहे. पहिल्या सत्रातील सुनावणीत ठाकरे गटाचे वकील देवदत्त कामत यांनी शिंदे गटाचे आमदार दिलीप लांडे यांची साक्ष घेतली. यावेळी ठाकरे गटाकडून मोठा दावा सादर केला गेला. दिलीप लांडेंच्या उलट तपासणी दरम्यान ठाकरे गटाच्या वकीलांनी एक अटेंडंटशिट सादर केली. ही अटेंडट शीट 21 जून 2022 रोजी वर्षा बंगल्यावर झालेल्या बैठकीची होती. या अटेंडंटशिटवर शिंदे गटातील तब्बल 23 आमदारांच्या सह्या आहेत. महत्त्वची बाब म्हणजे, या बैठकीत एकनाथ शिंदे यांना गटनेता पदावरून हटवण्याबाबत प्रस्ताव मांडण्यात आला होता, ज्याला या आमदारांनी अनुमोदन दिले होते. 21 जून 2022 रोजी वर्षा निवासस्थानी झालेल्या बैठकीत पक्षादेशानुसार किती आमदार उपस्थित होते? उलट तपासणी दरम्यान वारंवार येणाऱ्या प्रश्नावर ठाकरे गटाने शिंदे गटाच्या साक्षीदाराला आज 21 जून 2022 च्या बैठकीची अटेंडन्स शीट दाखवली आहे. ही अटेंडन्ट शीट ठाकरे गटाकडून प्रतिज्ञापत्रात दाखल करण्यात आली होती. या अटेंडंटशिटनुसार, सुनील प्रभू यांच्याकडून व्हीप जारी करून 21 जूनच्या बैठकीसाठी हजर राहण्याचे सूचना होत्या. या 21 जून 2022 रोजी झालेल्या बैठकीत एकूण 23 आमदारांनी उपस्थिती दर्शवली होती आणि त्यांच्या अटेंडन्स शीटवरील सह्या या संबंधित शिवसेना शिंदे गटात गेलेल्या आमदारांनीच केल्या होत्या का? असा सवाल शीट दाखवून ठाकरे गटाकडून विचारला जाणार आहे. या बैठकीला सध्या शिवसेना शिंदे गटात असलेले गुलाबराव पाटील, संजय राठोड, संतोष बांगर, दादा भुसे, दिलीप लांडे, मंगेश कुडाळकर, सदा सरवणकर, योगेश कदम, उदय सामंत, दीपक केसरकर हे सर्व आमदार उपस्थित होते, अशा प्रकारच्या सह्या या अटेंडंटस शीटवर आहेत. दरम्यान, दिलीप लांडे यांनी आपल्या साक्षीमध्ये यावर केलेली सही आपलीच असल्याचे कबूल केले आहे. पण त्यामध्ये वरती लिहिण्यात आलेल्या पक्षादेश क्रमांक हा आमच्या सह्या घेतल्यानंतर घेण्यात आला, असे त्यांनी म्हटले आहे. ठाकरे गटास एका दिवसाची मुदतवाढ शिवसेना आमदार अपात्रता सुनावणीच्या वेळापत्रकात मोठा बदल करण्यात आला आहे. उलट साक्ष घेण्यासाठी ठाकरे गटास एका दिवसाची मुदत वाढ देण्यात आली आहे. तर विधानसभा अध्यक्ष शनिवार आणि रविवारीही सुनावणी घेणार आहे. यामुळे एकूणच दिवस-रात्र सुनावणी होत असल्याने सर्वोच्च न्यायालयाने दिलेल्या निर्देशानुसार ३१ डिसेंबरपूर्वी निकाल लागण्याची शक्यता वर्तविण्यात येत आहे.
