Uddhav Thackeray : उद्धव ठाकरे हाजीर हो! कोर्टाने बजावलं समन्स, नेमकं प्रकरण काय?
Uddhav Thackeray : २००९ च्या लोकसभा निवडणुकीतील हे प्रकरण आहे. वसंत डावखरे विरुद्ध आनंद परांजपे अशी निवडणूक झाली होती.
Kalyan Court summons Uddhav Thackeray : आताच्या घडीची सर्वात मोठी बातमी समोर आली आहे. माजी मुख्यमंत्री आणि उबाठा गटाचे सर्वेसर्वेा उद्धव ठाकरे यांना कल्याण कोर्टाने समन्स बजावलं आहे. कल्याण कोर्टाने वसंत डावखरे प्रकरणी ठाकरेंना समन्स बजावले असून ५ अॅागस्ट या दिवशी त्यांना कोर्टात हजर राहण्यास सांगितलं आहे.
त्यामुळे उद्धव ठाकरे (Uddhav Thackeray ) कोर्टात हजर राहणार की वकिलामार्फत आपलं म्हणणं मांडणार, हे पाहणे महत्वाचे असणार आहे. याबाबत बातमी लिहिपर्यंत तरी कोणतीही उद्धव ठाकरेंच्या बाजूने प्रतिक्रिया समोर आलेली नाही. त्यामुळे या प्रकरणाची सुनावणी पार पडणार की काय होणार याकडे लक्ष लागले आहे.
नेमकं प्रकरण काय? (Uddhav Thackeray)
२००९ च्या लोकसभा निवडणुकीतील हे प्रकरण आहे. वसंत डावखरे विरुद्ध आनंद परांजपे अशी निवडणूक झाली होती. उद्धव ठाकरे यांनी त्यावेळी आनंद परांजपे यांच्यासाठी एक प्रचार सभा घेतली होती. या सभेतून राष्ट्रवादी काँग्रेसचे उमेदवार वसंत डावखरे यांचा एक व्हिडिओ दाखवला होता. याच प्रकरणी त्यांना कोर्टाने समन्स बजावलं आहे.
व्हिडिओमध्ये काय होतं? (Uddhav Thackeray)
या व्हिडिओमध्ये वसंत डावखरे कार्यकर्त्यांना निवडणूक जिंकण्यासाठी पोलिस आणि निवडणूक अधिकाऱ्यांची भीती न बाळगता प्रयत्न करण्याचे आवाहन करत असल्याचे दाखवण्यात आले होते. या प्रकरणी थेट निवडणूक अधिकाऱ्यांकडे धाव घेत तक्रार करण्यात आली होती. यानंतर वसंत डावखरे यांनी आपलं म्हणणं मांडलं. मात्र कोणतीही दाद मिळत नसल्याने ते कोर्टात गेले.
वसंत डावखरे यांचं काय म्हणणं होतं? (Uddhav Thackeray)
वसंत डावखरे यांनी व्हिडिओमधील कथित वक्तव्य फेटाळून लावले होते. संबंधित व्हिडिओ मॉर्फ करण्यात आल्याचा दावा त्यांनी केला होता. तसेच, व्हिडिओतील मजकूर निवडकपणे संपादित करून आपली बदनामी करण्याचा प्रयत्न झाल्याचा आरोपही डावखरे यांनी केला होता. या पार्श्वभूमीवर न्याय मिळवण्यासाठी त्यांनी थेट न्यायालयाचे दार ठोठावत या प्रकरणात दाद मागितली होती.
५ अॅागस्टला काय होणार? (Uddhav Thackeray)
दरम्यान, या प्रकरणातील प्रमुख तक्रारदार वसंत डावखरे यांचे निधन झाले असून ते आता हयात नाहीत. त्यामुळे या खटल्याची पुढील दिशा काय असेल आणि उद्धव ठाकरे यांची भूमिका नेमकी काय असेल, याकडे सर्वांचे लक्ष लागले आहे. याबाबतचे चित्र ५ ऑगस्ट रोजी अधिक स्पष्ट होण्याची शक्यता आहे. मात्र, अद्याप डावखरे कुटुंबीयांकडून कोणतीही अधिकृत प्रतिक्रिया समोर आलेली नाही.
