Uday Samant : भारतीय भाषा आणि साहित्याचा जगभरात प्रसार करणारे जागतिक मराठी भाषा केंद्र लंडनमध्ये पुढील दोन महिन्यांत सुरू केले जाईल, अशी माहिती मराठी भाषा मंत्री उदय सामंत (Uday Samant) यांनी मंगळवारी दिली.

सामंत (Uday Samant) यांनी सांगितले की, मुंबईत मराठी भाषा भवन उभारण्याचे काम वेगाने सुरू असून ही इमारत २०२७ पर्यंत तयार होईल. छत्रपती शिवाजी महाराज जागतिक मराठी भाषा केंद्र लंडनमध्ये पुढील दोन महिन्यांत सुरू केले जाईल. मराठी भाषा विभाग राज्यातील प्रत्येक जिल्ह्यात एका मराठी भाषा अधिकाऱ्याची नियुक्ती करेल.

मराठीला अभिजात भाषेचा दर्जा मिळाल्यानंतर, संबंधित विभागाने रत्नागिरी, नाशिक, नागपूर, पुणे, कोल्हापूर, छत्रपती संभाजीनगर आणि अमरावती येथे मराठी भाषा विकास केंद्रे सुरू करण्याचा निर्णय घेतला आहे. ही केंद्रे मराठी भाषेतील संशोधनाला चालना देण्यास मदत करतील. विद्यार्थी आणि संशोधकांना आवश्यक ती सर्व मदत पुरवली जाईल, अशी ग्वाही मंत्र्यांनी (Uday Samant) दिली.

मराठी भाषा भवनाच्या मुद्द्यावरून ठाकरेसेना प्रमुख उद्धव ठाकरे यांचे नाव न घेता त्यांच्यावर टीका करताना ते म्हणाले, ही इमारत पूर्ण झाल्यामुळे या प्रकल्पाशी संबंधित खोट्या प्रचाराला पूर्णविराम मिळेल. बृहन्मुंबई महानगरपालिका निवडणुकांदरम्यान ठाकरे यांनी भाजपच्या नेतृत्वाखालील महायुती सरकारवर हा प्रकल्प बासनात गुंडाळून ठेवल्याचा आरोप केला होता.