श्रीनगर : जम्मू-काश्मीरमध्ये अनंतनाग जिल्ह्यात बिजबेहराजवळील बलीपोरा गावात संशयित दहशतवाद्यांनी शनिवारी (29 मे) 2 स्थानिक युवकांवर अंधाधुंद गोळीबार केला. यात दोन्ही युवक गंभीर जखमी झाले. त्यांना तात्काळ रुग्णालयात हलवण्यात आले.

मात्र, त्यातील एकाच रुग्णालयात जात असताना रस्त्यातच मृत्यू झाला. दुसऱ्या युवकाचा रुग्णालयात उपचारादरम्यान मृत्यू झाला. गोळीबार केल्यानंतर हल्लेखोर घटनास्थळावरुन फरार झालेत. पोलिसांनी शोध मोहिम राबवत या परिसराची कडक नाकेबंदी केलीय

अज्ञात बंदुकधाऱ्यांनी दोन युवकांवर गोळीबार केला. यात ते दोघेही जखमी झाले. जखमींना जवळच्या रुग्णालयात भरती करण्यात आले. मात्र यातील अब्दुल अझीम पारे यांचा मुलगा संजीद अहमद पारे (19) याला मृत घोषित करण्यात आलं.

दुसरा घुकलाम कादिर भट यांचा मुलगा शान भटला उपचारासाठी श्रीनगरमधील SKIMS रुग्णालयात दाखल करण्यात आलं. मात्र, उपचारादरम्यान त्याचाही मृत्यू झाला. दरम्यान हल्लेखोरांना पकडण्यासाठी घटनास्थळाच्या परिसरात नाकेबंदी करण्यात आलीय. पोलिसांनी या भागात सुरक्षा व्यवस्था वाढवली आहे. येणाऱ्या जाणाऱ्या प्रत्येकाची तपासणी केली जात आहे.”

दरम्यान, अन्य एका घटनेत जम्मू काश्मीरमधील शोपियां जिल्ह्यात दहशतवादी आणि सुरक्षादलात चकमक झाली. यात एक दहशतवादी मारला गेला. शोपियां जिल्ह्यातील गनोवपोरा गावात एक दहशतवादी असल्याचं समजलं. त्यामुळे सुरक्षादलाने या भागात शोधमोहिम सुरू केली. यावेळी दहशतवाद्याने जवानांवर गोळीबार केला. यानंतर झालेल्या चकमकीत संबंधित दहशतवादी मारला गेला. घटनास्थळावरुन एक एके रायफल आणि काही आक्षेपार्ह साहित्य मिळालं आहे.

कुपवाडा जिल्ह्यात झालेल्या स्फोटात एका 19 वर्षीय तरुणीचा मृत्यू झालाय. या स्फोटात तरुणीची आई देखील जखमी झाली. हंडवाराच्या शरकूत विलगाम परिसरात राहणाऱ्या सारा बेगम (49) आणि त्यांची मुलगी गुलनाज बानो भाजी आणण्यासाठी जंगलात गेल्या. भाजी आणतानाच त्यांना जंगलात हा बॉम्ब सापडला असावा. मात्र त्यांना तो बॉम्ब असल्याचं लक्षात आलं नसावं. त्यांनी घरी आल्यावर भाजीची पिशवी रिकामी करण्यासाठी जशी जमिनीवर सोडली तसा बॉम्ब जमिनीवर आदळून स्फोट झाला.