नवी दिल्ली – हत्येच्या वेगवेगळ्या प्रकरणात दोषी आढळल्यानंतर दोन भारतीय नागरिकांना संयुक्त अरब अमिराती (यूएई) मध्ये फाशी देण्यात आली. मोहम्मद रिनाश अरंगीलोट्टू आणि मुरलीधरन पेरुमथट्टा वलप्पिल अशी फाशीची शिक्षा झालेल्या नागरिकांची नावे आहेत. दोघेही केरळचे रहिवासी आहेत, अशी माहिती परराष्ट्र मंत्रालयाने गुरुवारी दिली.

परराष्ट्र मंत्रालयाने सांगितले की, यूएईच्या सर्वोच्च न्यायालयाच्या कोर्ट ऑफ कॅसेशनने त्यांची शिक्षा कायम ठेवल्यानंतर दोघांना फाशी देण्यात आली आहे. मुहम्मद रिनाशला एका अमिराती नागरिकाच्या हत्येप्रकरणी दोषी ठरवण्यात आले होते, तर मुरलीधरनला एका भारतीयाच्या हत्येप्रकरणी शिक्षा सुनावण्यात आली होती.

UAE ने 28 फेब्रुवारी रोजी भारतीय दूतावासाला फाशीच्या शिक्षेची माहिती दिली. परराष्ट्र मंत्रालयाच्या म्हणण्यानुसार, दूतावासाने भारतीय नागरिकांसाठी इतर वाणिज्य दूत आणि कायदेशीर सहाय्याव्यतिरिक्त यूएई सरकारला माफी आणि दयेचे आवाहन पाठवले आहे.

परराष्ट्र मंत्रालयाने सांगितले की, संबंधित व्यक्तींच्या कुटुंबीयांना माहिती देण्यात आली आहे. दूतावासही त्यांच्या संपर्कात असून अंत्यसंस्काराला उपस्थित राहण्यासाठी सर्वतोपरी प्रयत्न करत आहे.

दरम्यान, या वर्षी फेब्रुवारीमध्ये, उत्तर प्रदेशातील एका 33 वर्षीय महिलेला डिसेंबर 2022 मध्ये संयुक्त अरब अमिराती (UAE) मध्ये तिच्या देखरेखीखाली असलेल्या चार महिन्यांच्या बाळाची हत्या केल्याप्रकरणी फाशी देण्यात आली होती. ती अबू धाबीमध्ये केअरटेकर म्हणून काम करत होती. नियमित लसीकरणानंतर बाळाचा मृत्यू झाला तेव्हा मृत्यूसाठी शहजादी नावाच्या भारतीय महिलेला जबाबदार धरण्यात आले होते.