अंकारा : तुर्कीयेमध्ये इस्लामिक स्टेटविरोधात धडक कारवाई सुरू करण्यात आली असून सुरक्षा दलांनी देशभरात ठिकठिकाणी छापे घालून इसिसशी संबंधित तब्बल ३५७ संशयितांची धरपकड केली आहे. कालच देशाच्या वायव्येकडील भागात सुरक्षा दलांबरोबर झालेल्या चकमकीमध्ये इसिसचे ६ दहशतवादी मारले गेले होते. यावेळी झालेल्या चकमकीमध्ये ३ पोलीस कर्मचारी देखील ठार झाले होते. सोमवारी राजधानी इस्तंबुलच्या दक्षिणेकडील भागातल्या यालोवा येथे तब्बल ८ तास दहशतवादीविरोधी चकमक सुरू होती. त्यानंतर आज ही धडक कारवाई सुरू करण्यात आली आहे. देशभरातील २१ प्रांतांमध्ये एकाचवेळी या कारवाईला सुरुवात करण्यात आली आणि ३५७ जणांना ताब्यात घेण्यात आले असल्याचे गृहमंत्री अली येरलीकाये यांनी सांगितले. दहशतवादासमोर गुडघे टेकण्याची वेळ आम्ही कधीही येऊ दिलेली नाही. भविष्यात देखील अशी वेळ आम्ही येऊ देणार नाही, असे त्यांनी म्हटले आहे. दहशतवादविरोधी एजन्सीचे अधिकारी छापे घालत असताना आणि संशयितांना ताब्यात घेत असल्याचे व्हिडीओ चित्रीकरण देखील गृहमंत्र्यांनी प्रसार माध्यमांना उपलब्ध करून दिले. आठवड्यापूर्वीच इस्लामिक स्टेटशी संबंधित सुमारे १०० जणांना ताब्यात घेण्यात आले आहे. ख्रिसमस आणि नववर्षाच्या स्वागतासाठी होणाऱ्या कार्यक्रमांना लक्ष्य करण्याचा कट या संशयित दहशतवाद्यांनी केल्याचा दावा सुरक्षा दलांनी केला आहे.
