Mahendra Thorve : दिवंगत उपमुख्यमंत्री अजित पवार यांच्या विमान अपघातप्रकरणावरून महाराष्ट्रातील राजकीय वातावरण पुन्हा तापले आहे. शिवसेना शिंदे गटाचे ज्येष्ठ नेते रामदास कदम यांनी या अपघातामागे घातपाताचा संशय व्यक्त करत राष्ट्रवादी काँग्रेसचे खासदार सुनील तटकरे यांच्या चौकशीची मागणी केली होती. आता त्यांच्या या मागणीला शिवसेनेचे आमदार महेंद्र थोरवे यांनीही समर्थन दिले आहे.

जानेवारी २०२६ मध्ये बारामती येथे झालेल्या विमान अपघातात अजित पवार यांचा मृत्यू झाला. या घटनेबाबत संशय व्यक्त करत रामदास कदम यांनी सुनील तटकरे यांच्याबाबत गंभीर प्रश्न उपस्थित केले होते. अजित पवार यांच्या अपघातामागे काही घातपात होता का? सुनील तटकरे यांची सखोल चौकशी झाली पाहिजे, अशी मागणी त्यांनी केली होती.

यावेळी कदम यांनी सुनील तटकरे यांच्यावर टीका करताना दिवंगत नेते अंतुले यांचाही उल्लेख केला होता. ‘हा अंतुले साहेबांचा पीए होता, अंतुले साहेबांना यानेच संपवलं. जो जो माणूस तटकरे यांना जवळ करतो, त्यालाच संपवण्याचं काम तो करतोय,’ असे विधान त्यांनी केल्याने एकच खळबळ उडाली.

महेंद्र थोरवेंनीही घेतली रामदास कदमांची बाजू

रामदास कदम यांच्या आरोपानंतर आता शिवसेनेचे आमदार महेंद्र थोरवे यांनीही सुनील तटकरे यांच्या चौकशीची मागणी केली आहे. अजित पवार यांच्या मृत्यूमागे घातपाताचा संशय असल्यास या प्रकरणाची सखोल चौकशी झाली पाहिजे, असे त्यांनी म्हटले आहे.

थोरवे यांनी राष्ट्रवादी काँग्रेसमधील राजकीय घडामोडींचाही उल्लेख केला. दोन्ही राष्ट्रवादी काँग्रेसच्या विलीनीकरणासंदर्भात चर्चा सुरू असताना सुनील तटकरे यांना या प्रक्रियेत सहभागी करून घेतले जात नव्हते. पवार कुटुंबातील विश्वासू नेत्यांमध्ये यासंदर्भात चर्चा होत होती, असा दावा त्यांनी केला.

तसेच अजित पवार यांच्या निधनानंतर लगेचच सुनील तटकरे यांनी हॉटेल सिटी इनमध्ये अनेक आमदारांना आपल्या बाजूने वळवण्यासाठी फोन केल्याचा आरोपही थोरवे यांनी केला. मात्र, या प्रयत्नात त्यांना यश आले नसल्याचेही त्यांनी म्हटले आहे.

सुनील तटकरेंचा आरोपांना नकार; कायदेशीर नोटीस पाठवणार

दरम्यान, रामदास कदम यांनी केलेले आरोप सुनील तटकरे यांनी फेटाळून लावले आहेत. माझ्यावर करण्यात आलेले आरोप खोटे आणि बिनबुडाचे आहेत. या प्रकरणी रामदास कदम यांना कायदेशीर नोटीस पाठवणार असल्याचा इशाराही त्यांनी दिला आहे.

Abhijeet Kelkar: ‘बिल्डरच्या गावगुंडांनी…’ अभिनेता अभिजीत केळकरचा SRA कारभारावर गंभीर आरोप; थेट मुख्यमंत्री-उपमुख्यमंत्र्यांकडे मागितला न्याय!