कोलकता – पश्‍चिम बंगालमधील पंचायत निवडणुकीतील हिंसाचाराच्या बातम्या समोर येत आहेत. पंचायत निवडणुकीदरम्यान झालेल्या निवडणुकीच्या हिंसाचारावरून राज्यपाल आणि सत्ताधारी यांच्यात संघर्ष सुरूच आहे. दरम्यान, तृणमूल कॉंग्रेसचे खासदार सौगता रॉय यांनी सांगितले की, या हिम्साचारात त्यांच्या पक्षाचे तीन लोक मारले गेले आहेत. कायदा आणि सुव्यवस्था राज्य सरकारच्या अखत्यारीत आहे, हे राज्यपालांचे काम नाही. निवडणुकीतील हिंसाचाराकडे लक्ष देणे हे राज्य निवडणूक आयुक्तांचे काम आहे. निवडणुका जाहीर झाल्यानंतर राज्यपालांची कोणतीही भूमिका नसते.

कोलकाता उच्च न्यायालयाने पंचायत निवडणुकीदरम्यान काही जिल्ह्यांमध्ये केंद्रीय दलांची नियुक्ती करण्याचे आदेश दिले होते. त्याचवेळी बंगालचे राज्यपाल सीव्ही आनंद बोस यांनी राज्य निवडणूक आयोगाचे आयुक्त राजीव सिन्हा यांना पंचायत निवडणुकीशी संबंधित मुद्द्यावर चर्चा करण्यासाठी राजभवनात बोलावले होते. मात्र पश्‍चिम बंगाल राज्य निवडणूक आयोगाने कलकत्ता उच्च न्यायालयाच्या निर्णयाला आव्हान देत सर्वोच्च न्यायालयात धाव घेतली.

खासदार सौगता रॉय यांच्या वक्तव्यावर पलटवार करत पश्‍चिम बंगाल भाजपच्या अध्यक्षा सुकांता मजुमदार म्हणाल्या की, मुख्यमंत्री ममता बॅनर्जी एक गोष्ट सांगत आहेत आणि सौगता रॉय काहीतरी वेगळेच. राज्य निवडणूक आयोग अधिकृत अहवालाच्या आधारे म्हणत आहे की, पंचायत निवडणुकीदरम्यान कोणीही मरण पावले नाही आणि कोणताही राजकीय संघर्ष झालेला नाही. राज्य सरकार आणि राज्य निवडणूक आयोग दोघेही शांत बसले असून हिंसाचार रोखण्यासाठी कोणीही काहीही करत नाहीत. त्यामुळेच बंगालच्या लोकांना वाचवण्याचा प्रयत्न करणाऱ्या राज्यपालांचे आम्ही आभार मानतो.

केंद्रीय मंत्री मीनाक्षी लेखी यांनी उमेदवारी अर्ज भरताना पश्‍चिम बंगालमधील हिंसाचारावर भाष्य करताना सांगितले की, केवळ भाजप नेत्यांवरच हल्ले होत नाहीत, तर पश्‍चिम बंगालमधील जनतेचा आवाजही ऐकला जात नाही. तेथे न्यायालयाच्या आदेशाचा आदर केला जात नाही. पश्‍चिम बंगालमध्ये अराजकतेची परिस्थिती निर्माण होत असून त्यांना त्यांच्या पद्धतीने देश आणि जग चालवायचे आहे.
दुसरीकडे, पश्‍चिम बंगालचे कूचबिहार एसपी सुमित कुमार यांनी सांगितले की, साहेबगंज पोलिस स्टेशन परिसरात शंभू दास नावाच्या एका व्यक्तीचा मृतदेह त्यांच्या घराजवळील तागाच्या शेतात आढळला. शरीरावर जखमेच्या खुणा होत्या. पोलीस या प्रकरणाचा तपास करत आहेत.