Tata Group : टाटा समूहातील आघाडीची रिटेल कंपनी ट्रेंट लिमिटेडच्या व्यवस्थापनात मोठा बदल होणार आहे. कंपनीचे विद्यमान अध्यक्ष नोएल एन. टाटा हे ११ नोव्हेंबर २०२६ रोजी कामकाज संपल्यानंतर अध्यक्ष आणि संचालक पदावरून निवृत्त होणार आहेत. त्यानंतर १२ नोव्हेंबरपासून बहराम वकील ट्रेंटचे नवे अध्यक्ष म्हणून जबाबदारी स्वीकारतील.

नोएल टाटा यांनी ट्रेंटमध्ये तब्बल २९ वर्षे योगदान दिले आहे. त्यांच्या कामाची दखल घेत कंपनीच्या संचालक मंडळाने त्यांची ‘चेअरमन एमेरिटस’ म्हणून नियुक्ती करण्याचा निर्णय घेतला आहे. टाटा समूहाच्या व्यवस्थापन आणि प्रशासनाच्या मार्गदर्शक तत्त्वांनुसार हा बदल करण्यात आला आहे.

नोएल टाटा यांच्या नेतृत्वाखाली ट्रेंटने रिटेल आणि फॅशन क्षेत्रात मोठी प्रगती केली. कंपनीने एका छोट्या ब्रँडपासून या क्षेत्रातील महत्त्वाच्या कंपन्यांपैकी एक म्हणून आपली ओळख निर्माण केली.

याशिवाय कंपनीच्या संचालक मंडळातही बदल करण्यात आले आहेत. राजीव दुबे यांची ३० ऑक्टोबरपासून नॉन-एक्झिक्युटिव्ह आणि नॉन-इंडिपेंडंट अतिरिक्त संचालक म्हणून नियुक्ती करण्यात आली आहे. त्यांना टाटा मोटर्स आणि आदित्य बिर्ला समूहासह विविध क्षेत्रांतील ४० वर्षांहून अधिक अनुभव आहे.

तसेच कल्पना मर्चंट यांची ३० ऑक्टोबर २०२६ पासून तीन वर्षांसाठी स्वतंत्र अतिरिक्त संचालक म्हणून नियुक्ती करण्यात आली आहे. त्यांना कायदा क्षेत्रातील ४५ वर्षांहून अधिक अनुभव आहे.