Tree Collapse – नसरापूर-वेल्हे रोडवरील कुरुंगवडी परिसरात शनिवारी (दि. १६) सायंकाळच्या सुमारास वादळी वाऱ्यासह झालेल्या जोरदार पावसामुळे रस्त्यालगत असलेले पिंपरणीचे मोठे झाड अचानक रस्त्यावर कोसळले. या घटनेत सुदैवाने कोणतीही जीवितहानी झाली नाही. मात्र, झाड कोसळत असतानाच त्याच मार्गावरून जाणारी एक फॉर्च्युनर गाडी काही क्षणांच्या फरकाने थोडक्यात बचावली. अन्यथा मोठी दुर्घटना घडली असती. झाड कोसळल्यामुळे नसरापूर-वेल्हे मार्गावरील वाहतूक काही काळ विस्कळीत झाली होती. स्थानिक नागरिकांनी तत्काळ घटनास्थळी धाव घेत झाडाच्या फांद्या बाजूला करून मार्ग मोकळा करण्याचा प्रयत्न केला. झाड कोसळताना रस्त्यावरून जाणारी महावितरणची मुख्य ‘एचटी’ वीजवाहिनी (हायटेन्शन लाईन) तुटली. यामुळे संपूर्ण परिसराचा वीजपुरवठा खंडित झाला असून नागरिकांना अंधाराचा सामना करावा लागत आहे. या मार्गावर अनेक मोठी झाडे वीजवाहिन्यांवर झुकलेली असून महावितरणने तातडीने अशा धोकादायक झाडांची छाटणी करावी, अशी मागणी ग्रामस्थांमधून होत आहे. मान्सूनपूर्व काळातच वादळी वारे व मुसळधार पावसाला सुरुवात झाल्याने रस्त्यालगतची जुनी आणि कमकुवत झाडे प्रवाशांसाठी धोकादायक ठरत आहेत. सार्वजनिक बांधकाम विभागाने नसरापूर-वेल्हे मार्गाची संयुक्त पाहणी करून धोकादायक झाडे तातडीने हटवावीत, अशी मागणी नागरिकांनी केली आहे. वेळीच उपाययोजना न केल्यास भविष्यात होणाऱ्या जीवितहानीला प्रशासन जबाबदार राहील, असा इशाराही स्थानिकांनी दिला आहे. “झाड कोसळताना मोठा आवाज झाला आणि काही क्षणांसाठी घबराट पसरली. घटनास्थळाजवळ अजून एक त्याच प्रजातीचे मोठे झाड असून तेही धोकादायक अवस्थेत आहे. ते कधीही कोसळू शकते, त्यामुळे प्रशासनाने तातडीने कारवाई करावी.” – जगदीश जगताप, प्रत्यक्षदर्शी.
