कराड : शहराजवळ पुणे- बंगळुरू महामार्गावर मंगळवारी रात्री ११ वाजण्याच्या सुमारास भीषण अपघात झाला. कोल्हापूरच्या महालक्ष्मीचे दर्शन घेऊन स्कॉर्पिओ गाडीने गावाकडे परतणाऱ्या चार तरुण मित्रांचा या अपघातात दुर्दैवी अंत झाला. तर अन्य तीनजण गंभीर जखमी झाले. कराडजवळ काही दिवसांपूर्वीच वाहतुकीस खुला करण्यात आलेल्या नव्या सहापदरी उड्डाणपूलावरील हा पहिलाच अत्यंत भीषण अपघात ठरला आहे. अपघातातील सर्व तरुण साताऱ्यातील खटाव तालुक्यातील कातरखटाव गावचे रहिवासी आहेत.

तेजस देशमुख (वय २५), सागर निंबाळकर (वय २३), सुयश चिंचकर (वय २०) आणि रोहित धोत्रे (वय २१) अशी अपघातात ठार झालेल्या मित्रांची नावं आहेत. तर ऋतुराज दुबळे (वय २१), शंतनू शिंगाडे (वय २०) आणि अमन तांबोळी (वय २३) हे जखमी आहेत. अपघातस्थळावरून मिळालेल्या माहितीनुसार, कातरखटाव गावातील काही तरुण दसऱ्यानिमित्ताने कोल्हापूर येथील आई महालक्ष्मीच्या दर्शनासाठी स्कॉर्पिओ गाडीने गेले होते. दर्शन घेऊन सर्वजण रात्रीच्या सुमारास आपल्या गावी परतत होते. दरम्यान, रात्री साधारण ११ वाजण्याच्या सुमारास कराड शहराजवळ पुणे-बंगळ महामार्गावरील नवीन सहापदरी उड्डाणपूलावर त्यांची स्कॉर्पिओ गाडी एका ट्रकवर मागून धडकली. हा अपघात इतका भीषण होता की गाडीचा चुराडा झाला.

या भीषण अपघातात चार तरुण जागीच ठार झाले. तर तीनजण गंभीर जखमी झाले. जखमींवर कराडच्या कृष्णा रुग्णालयात सध्या उपचार सुरू आहेत. अपघाताची माहिती मिळताच पोलीस उपअधीक्षक क्षक राजश्री पाटील, कराड शहर पोलीस ठाण्याचे वरिष्ठ पोलीस निरीक्षक दत्तात्रय दराडे, कराड वाहतूक शाखेचे संदीप साळुंखे, संग्राम पाटील, अमृत बाबर, दस्तगीर आगा, राहुल कदम, सचिन देवकर तसेच स्थानिक नागरिकांनी तातडीने घटनास्थळी धाव घेतली.