Toxic Box Office Day 2: यश आणि दिग्दर्शक गीतू मोहनदास यांच्या ‘टॉक्सिक : अ फेयरी टेल फॉर ग्रोन-अप्स’ या चित्रपटाने बॉक्स ऑफिसवर चांगली सुरुवात केली असली, तरी दुसऱ्या दिवशी कमाईचा वेग काहीसा मंदावल्याचे दिसत आहे.

चित्रपटाला संमिश्र प्रतिक्रिया मिळत असूनही पहिल्या दिवशी देशांतर्गत बॉक्स ऑफिसवर ₹101.10 कोटींची कमाई झाली होती. दुसऱ्या दिवशी गुरुवारी रात्री 9 वाजेपर्यंत चित्रपटाने भारतात ₹19.73 कोटींची नेट कमाई केल्याची माहिती ट्रेड वेबसाइट Sacnilkने दिली आहे.

दुसऱ्या दिवशी ‘टॉक्सिक’च्या 19,413 शोची एकूण ऑक्युपन्सी 23.9 टक्के राहिली. कन्नड ही चित्रपटाची मूळ भाषा असली, तरी हिंदी आवृत्तीची कामगिरी अधिक चांगली आहे. त्यानंतर तेलुगू आवृत्ती असून तमिळ आणि मल्याळम आवृत्तीची कमाई तुलनेने कमी आहे.

विशेष म्हणजे ‘टॉक्सिक’ची तुलना ‘धुरंधर 2’शी केली जात आहे. ‘धुरंधर 2’ने दुसऱ्या दिवशी तब्बल ₹80.72 कोटींची कमाई केली होती. ‘धुरंधर’च्या पहिल्या भागाने दुसऱ्या दिवशी ₹32 कोटी कमावले होते. त्यामुळे दुसऱ्या दिवसाच्या कमाईत ‘टॉक्सिक’ दोन्ही चित्रपटांपेक्षा मोठ्या फरकाने मागे आहे.

‘टॉक्सिक’ने पहिल्या दिवशी भारतात ₹101.10 कोटी नेट, तर जगभरात ₹140 कोटींची कमाई केली. पहिल्या दिवशी 24,579 शोमध्ये 56.1 टक्के ऑक्युपन्सी नोंदवली गेली. हिंदीत ₹55 कोटी, तर कन्नडमध्ये ₹23.30 कोटींची कमाई झाली. दुसरीकडे ‘धुरंधर 2’ने पहिल्याच दिवशी ₹102.55 कोटी, तर प्रीमियरमधून ₹43 कोटी कमावले होते.

‘टॉक्सिक’चे दिग्दर्शन गीतू मोहनदास यांनी केले असून वेंकट के. नारायण आणि यश यांनी KVN Productions आणि Monster Mind Creations LLPच्या माध्यमातून निर्मिती केली आहे. यशने राय आणि तिकीट अशा दुहेरी भूमिका साकारल्या आहेत. चित्रपटात कियारा अडवाणी, नयनतारा, हुमा कुरेशी, तारा सुतारिया आणि रुक्मिणी वसंत यांच्याही भूमिका आहेत.

2023 मध्ये या चित्रपटाची अधिकृत घोषणा झाली होती. मोठ्या बजेटमध्ये तयार करण्यात आलेल्या या चित्रपटावर प्रदर्शनानंतर हिंसक दृश्ये, सेन्सुअल सीन्स आणि भावनिक खोलीचा अभाव असल्याची टीका झाली. आता वीकेंडमध्ये ‘टॉक्सिक’ची कमाई कितपत वाढते आणि चित्रपट नकारात्मक प्रतिक्रियांवर मात करून बॉक्स ऑफिसवर टिकतो का, याकडे लक्ष लागले आहे.