Ashok Kharat Case : नाशिकमधील भोंदू बाबा अशोक खरात प्रकरणाची व्याप्ती मोठी आहे. या प्रकरणाची एसआयटीमार्फत कसून चौकशी सुरू असून, या प्रकरणात दररोज हादरवणारे खुलासे समोर येत आहेत. आता प्रकरणात एक महत्वपूर्ण उलघडा झाला आहे. खरात महिलांना लक्ष्य करून त्याच्यांशी गोड बोलून, त्यांची स्तुती करून आणि भावनिक पातळीवर जवळीक साधून त्यांना आपल्या जाळ्यात ओढत होता. “तू खूप सुंदर आहेस”, “तुझा पती तुला समजून घेत नाही”, “तुझी खरी क्षमता कोणालाच कळत नाही” या शब्दांनी महिलांना प्रभावित करत असल्याचे चौकशीतून समोर आले आहे. याबाबत मिळालेल्या माहितीनुसार, खरात ‘माइंड रीडिंग’मध्ये तरबेज असल्याने समोरच्या व्यक्तीच्या भावना आणि देहबोलीचा अभ्यास करून त्याच पद्धतीने त्याच्यासोबत तो संवाद साधत विश्वास संपादन करायचा. पीडित महिलांच्या म्हणण्यानुसार, त्यांच्या मनातील भीती, असुरक्षितता आणि भावनिक कमकुवत बाजू ओळखून त्यावर तो नेमका प्रहार करत असे. या पद्धतीने तो महिलांना मानसिकदृष्ट्या जखडून ठेवत असल्याचा आरोप आहे. चौकशीत त्याने भावनिक संवाद साधून जाळं विणल्याची कबुली दिल्याचीही माहिती समोर येत आहे. दरम्यान, किती महिलांचे शोषण केले याबाबत विचारले असता खरातने स्पष्ट उत्तर देण्यास टाळाटाळ केली आहे. “नेमका आकडा सांगता येणार नाही,” असा दावा त्याने केल्याचे सूत्रांकडून समजते. नाशिकमधील भोंदू बाबा अशोक खरातचे कुक्रर्म समोर आल्यानंतर अनेक महिलांनी त्याच्याविरोधात तक्रार दाखल करत लैंगिक शोषण केल्याचा आरोप केला आहे. त्यानुसार खरातवर आत्तापर्यंत एकूण 10 गुन्हे दाखल करण्यात आले असून, यापैकी 8 गुन्हे महिलांचे लैंगिक शोषणासंबधित आहेत, तर 2 गुन्हे आर्थिक फसवणुकीचे आहेत. ईडीची एन्ट्री? या प्रकरणात मोठे आर्थिक गैरव्यवहारही झाल्याचा संशय व्यक्त केला जात आहे. विशेष तपास पथकाच्या प्राथमिक चौकशीत खरातने हवाला रॅकेट आणि व्याजाच्या धंद्यातून कोट्यवधी रुपयांची उलाढाल केल्याची माहिती पुढे आली आहे. खरातच्या आर्थिक व्यवहारांचा सविस्तर अहवाल आता अंमलबजावणी संचालनालयाकडे (ईडी) पाठवला जाण्याची शक्यता आहे. त्यानंतर या प्रकरणात ईडीची देखील एन्ट्री होऊ शकते. आज खरातला कोर्टात हजर केले जाणार आज 29 मार्चला अशोक खरातची पोलीस कोठडी संपत असून, त्याला पुन्हा नाशिक जिल्हा न्यायालयात हजर केले जाणार आहे. एसआयटीकडून त्याच्या पोलीस कोठडीत आणखी वाढ करण्यात यावी अशी मागणी करण्याची शक्यता आहे. तसेच तपासादरम्यान आतापर्यंत काय माहिती समोर आली, याचा सविस्तर अहवाल न्यायालयात सादर केला जाऊ शकतो. त्यामुळे आज न्यायालयात काय काय घडते याकडे लक्ष असणार आहे. हेही वाचा : Vijaypat Singhania death: रेमंडचे विजय सिंघानिया काळाच्या पडद्याआड ; 87 व्या वर्षी घेतला अखेरचा श्वास
