BMC Election Result – शिंदेसेनेने मुंबईच्या महापौर पदावरून वेगळे काही घडण्याची शक्यता ठामपणे फेटाळून लावली. तसेच, मुंबई पालिकेत महायुतीचीच सत्ता येणार असल्याचाही ग्वाही दिली. शिंदेसेनेच्या नेत्या शीतल म्हात्रे यांनी पक्षाच्या वतीने भूमिका मांडली. भाजप आणि आमचा पक्ष महायुतीचे घटक म्हणून निवडणुकीला सामोरे गेल्याची बाब त्यांनी अधोरेखित केली. आम्हाला हॉटेल पॉलिटिक्स करण्याची कुठली गरज नाही. आम्ही महायुती म्हणून लढलो आणि जिंकलो. पाठीत खंजीर खुपसण्याची आमची भूमिका नाही. ठाकरेसेनेच्या उमेदवारांना हरवून आमचे नगरसेवक निवडून आले. त्यातील अनेक जण नवखे आहेत. त्यांना पालिका कामकाजाची माहिती नाही. त्यांच्या प्रशिक्षणासाठी हॉटेलमध्ये शिबीर आयोजित करण्यात आले आहे. भाजप आणि आमची युती नैसर्गिक स्वरूपाची आहे. बार्गेनिंग पॉवर वाढवण्यासाठी आम्ही कुठली कृती करत नाही. महायुतीचे नेते एकत्रितपणे महापौर पदाविषयीचा निर्णय घेतील, असे त्या म्हणाल्या.
