Municipal Corporation Election | राज्यातील 29 महापालिकांसाठी आज गुरुवार 15 जानेवारी 2026 पासून मतदानाला सुरुवात होत आहे. सकाळी 7.30 वाजता मतदानाला सुरुवात झाली असून संध्याकाळी 5.30 पर्यंत मतदान करता येणार आहे. तर उद्या 16 जानेवारीला मतमोजणी होणार आहे. मुंबईतील प्रत्येक प्रभागातील मतदारांना केवळ एकच मत द्यावे लागेल. मुंबई वगळता राज्यातील इतर २८ महानगरपालिकांमध्ये बहुसदस्यीय प्रभाग आहेत. काही प्रभाग ४ सदस्यीय आहेत. तर काही प्रभाग ३ अथवा ५ सदस्यीय आहेत. त्यामुळे मतदारांना तितक्या संख्येनुसार मते द्यावी लागणार असल्याचे राज्य निवडणूक आयोगाने म्हटले आहे. राज्यातील २९ महानगरपालिकांमधील एकूण जागांची संख्या २,८६९ आहे. तर एकूण प्रभाग संख्या ८९३ एवढी आहे. त्यात महिलांसाठी १,४४२ जागा आरक्षित आहेत. या महानगरपालिका क्षेत्रामध्ये ३ कोटी ४८ लाख ७८ हजार १७ मतदार असून ते १५,९३१ उमेदवारांचे भवितव्य ठरवतील. मोहन भागवत, रवींद्र चव्हाण यांनी केलं मतदान दरम्यान, पुण्यात ज्येष्ठ नागरिकांची सकाळीच लाईन लागली आहे. तर पुण्यात ४००० मतदान केंद्र असून ३५ लाख मतदार आहेत. याशिवाय नागपूरमध्ये मोहन भागवत तर भाजप प्रदेश अध्यक्ष रवींद्र चव्हाण यांनी डोंबिवलीत परिवारसह नुकताच मतदानाचा अधिकार बजावला आहे. Municipal Corporation Election | कोणत्या महानगरपालिकांसाठी होतेयं निवडणूक ? बृहन्मुंबई महानगरपालिका, ठाणे, नवी मुंबई, उल्हासनगर, कल्याण-डोंबिवली, भिवंडी-निजामपूर, मिरा-भाईंदर, वसई-विरार, पनवेल, नाशिक, मालेगाव, अहिल्यानगर, जळगाव, धुळे, पुणे, पिंपरी-चिंचवड, सोलापूर, कोल्हापूर, इचलकरंजी, सांगली-मिरज-कुपवाड, छत्रपती संभाजीनगर, नांदेड-वाघाळा, परभणी, जालना, लातूर, अमरावती, अकोला, नागपूर, चंद्रपूर. Municipal Corporation Election | हेही वाचा: PMC Election: शहराला पोलीस छावणीचे स्वरूप! १२ हजार जवानांचा खडा पहारा; पहा बंदोबस्ताचा ‘मास्टर प्लॅन’
