मुंबई : राज्यातील बहुप्रतिक्षित 264 नगरपरिषदा आणि नगरपंचायतींसाठी आज पहिल्या टप्प्यात मतदान पार पडत आहे. सुमारे 1 कोटी मतदार 6042 नगरसेवक आणि 264 नगराध्यक्षांच्या निवडीसाठी आपला हक्क बजावत आहेत. सत्ताधारी महायुती आणि विरोधी महाविकास आघाडी यांच्यात थेट लढत असली तरी, अनेक ठिकाणी दोन्ही आघाड्यांतील पक्षांनी एकमेकांविरोधात दंड थोपटल्याचे चित्र आहे. निवडणुकीतील गंभीर घटना आणि गोंधळ – मतदान प्रक्रिया काही ठिकाणी शांततेत पार पडली असली तरी, अनेक ठिकाणी तणाव, वादावादी आणि नियमांचे उल्लंघन झाल्याच्या घटना घडल्या आहेत. परभणीच्या सोनपेठ येथे सत्ताधारी राष्ट्रवादीचे आमदार राजेश विटेकर आणि परिवर्तन विकास आघाडीचे माजी आमदार व्यंकटराव कदम यांच्यात बाचाबाची झाल्याने मोठा तणाव निर्माण झाला, जो पोलिसांनी मध्यस्थी करून मिटवला. हिंगोली येथे शिवसेनेचे आमदार संतोष बांगर यांच्यावर मतदान गोपनीयतेचा भंग केल्याप्रकरणी गुन्हा दाखल करण्यात आला आहे. त्यांनी मतदान केंद्रात एका महिलेला मतदानासाठी सूचना दिल्याचा आणि घोषणाबाजी केल्याचा व्हिडिओ व्हायरल झाला होता. मुख्यमंत्री देवेंद्र फडणवीस यांनीही यावर नाराजी व्यक्त केली आहे. रायगड जिल्ह्यातील महाड नगरपरिषदेत मतदान सुरू असताना दोन गटांमध्ये जोरदार हिंसाचार उफाळून आला. गोगावले आणि सुशांत जाबरे यांच्या समर्थकांमध्ये झालेल्या वादामुळे मारहाण झाली आणि मतदारांना मतदान केंद्रातून पळ काढावा लागला. सांगलीच्या जतमध्ये मतदान केंद्रावर भाजप कार्यकर्ते आणि पोलिसांमध्ये वादावादी झाली. एका भाजप उमेदवाराला केंद्राबाहेर काढल्याने समर्थक आक्रमक झाले होते. बुलढाणा आणि जळगावच्या जामनेरमध्ये तसेच शिर्डी नगरपरिषदेत अनेक ठिकाणी बोगस मतदान आणि बोगस मतदार पकडल्याच्या घटना समोर आल्या आहेत. काँग्रेसने बोगस मतदारांना वाहनातून आणल्याचा आरोप करत कठोर कारवाईची मागणी केली आहे. राष्ट्रवादी काँग्रेस (शरदचंद्र पवार गट) चे आमदार जयंत पाटील यांनी निवडणुकीत ‘नंगानाच’ सुरू असल्याचा आणि पालिका खरेदी करण्याचा उद्योग सुरू असल्याचा गंभीर आरोप केला. EVM मध्ये तांत्रिक बिघाड झाल्यामुळे कळमनुरीमध्ये पाच आणि हिंगोलीत एका ठिकाणी मतदान यंत्र बदलावे लागले, तर अनेक केंद्रांवर मतदारांना तांत्रिक बिघाडामुळे प्रतीक्षा करावी लागली. निकालाची तारीख पुढे ढकलली: या निवडणुकीतील सर्वात मोठा आणि महत्त्वाचा निर्णय मुंबई उच्च न्यायालयाच्या नागपूर खंडपीठाने दिला आहे. सुरुवातीला उद्या, 3 डिसेंबर रोजी होणारी मतमोजणी आता रद्द करण्यात आली आहे. हायकोर्टाच्या आदेशानुसार, या निवडणुकीचे निकाल आता 21 डिसेंबर रोजी जाहीर होतील. 20 नगरपरिषदा व नगरपंचायत निवडणुकींच्या निकालाबाबत याचिकाकारांनी एकाच दिवशी निकाल जाहीर करण्याची मागणी केली होती, त्यामुळे हा निर्णय घेण्यात आला. मुख्यमंत्री देवेंद्र फडणवीस यांनी निकालाच्या तारखेत कोर्टाच्या हस्तक्षेपामुळे झालेल्या विलंबावर संताप व्यक्त केला, ‘नियमांचा चुकीचा अर्थ लावला गेला’ असे ते म्हणाले. आमदार रोहित पवार यांनी निकालाला झालेल्या विलंबावरून निवडणूक आयोग आणि भाजपवर टीका केली असून, आयोगाच्या भोंगळ कारभारावर शिक्कामोर्तब झाल्याचे म्हटले. दरम्यान, न्यायालयीन प्रकरणांमुळे बाधित असलेल्या 24 नगरपरिषदा आणि नगरपंचायतींमध्ये तसेच 76 नगरपरिषदा व नगरपंचायतींमधील 154 बाधित जागांसाठी सुधारित कार्यक्रमानुसार 20 डिसेंबर रोजी मतदान होणार आहे. लोकशाहीचा उत्साह – गोंधळ आणि वादाच्या पार्श्वभूमीवर काही ठिकाणी मतदारांनी लोकशाहीवरील आपला विश्वास दाखवला. ऑस्ट्रेलियातील मेलबर्न येथे नोकरी करणारा अन्सार कासिम मुल्ला या तरुणाने मतदानाचा हक्क बजावण्यासाठी सांगलीच्या शिराळ्यात खास प्रवास करून दाखल झाला. मालवण आणि तळोदा येथे नवरदेव-वधूने बोहल्यावर चढण्याआधी किंवा लग्न सोहळ्यादरम्यान आपला मतदानाचा हक्क बजावला. या सर्व घडामोडींमुळे स्थानिक स्वराज्य संस्थांच्या निवडणुकीतील उत्सुकता आणि तणाव आणखी वाढला आहे. 21 डिसेंबर रोजीच्या निकालाकडे आता संपूर्ण राज्याचे लक्ष लागले आहे.
