Vijay Hazare Trophy : हैदराबादचा २१ वर्षीय युवा सलामीवीर अमन राव पेरालाने विजय हजारे ट्रॉफी २०२५-२६ मध्ये इतिहास रचला आहे. त्याने आज राजकोटच्या निरंजन शाह स्टेडियमवर बंगालविरुद्धच्या सामन्यात अवघ्या तिसऱ्या लिस्ट ए सामन्यात नाबाद २०० धावा झळकावल्या. १५४ चेंडूंच्या या खेळीत त्याने १२ चौकार आणि १३ षटकार ठोकले, ज्यामुळे त्याचा स्ट्राईक रेट १२९.८७ इतका राहिला. या धडाकेबाज खेळीच्या जोरावर हैदराबादने ५० षटकांत ५ बाद ३५२ धावा उभारल्या आणि सामना १०७ धावांनी जिंकला. अमनने डावाची सुरुवात सावध केली, पहिल्या १० चेंडूत फक्त ३ धावा केल्या. मात्र नंतर त्याने बंगालच्या अनुभवी गोलंदाजीवर ताबा मिळवला. गहलोत राहुल सिंगसोबत त्याने पहिल्या विकेटसाठी १०४ धावांची महत्त्वपूर्ण भागीदारी केली, ज्यात राहुलने ५४ चेंडूत ६५ धावा केल्या. अमनने आपले शतक १०७ चेंडूत पूर्ण केले आणि तसेच त्याने शेवटच्या बॉलवर उत्तुंग षटकार ठोकून त्याने आपले द्विशतक पूर्ण केले. त्याच्या एकूण धावांपैकी १२६ धावा केवळ बाउंड्री आणि षटकारांमधून आल्या. टिळक वर्मा (कर्णधार) ने ३४ धावा जोडल्या, तर इतर फलंदाजांनी छोटी योगदान दिली. या द्विशतकाने अमनने अनेक विक्रम मोडले. हे विजय हजारे ट्रॉफीतील नववे द्विशतक ठरले असून स्पर्धेतील यंदाच्या हंगामातील दुसरे सर्वोच्च वैयक्तिक स्कोअर आहे (ओडिशाच्या स्वस्तिक सामलच्या २१२ नंतर). लिस्ट ए क्रिकेटमध्ये भारतीय फलंदाजाच्या द्विशतकांची संख्या १५ वर पोहोचली. हैदराबादसाठी लिस्ट ए मधील हे सर्वोच्च वैयक्तिक स्कोअर ठरले. बंगालच्या गोलंदाजांना अमनने सळो की पळो करून सोडले. भारतीय संघातील दिग्गज मोहम्मद शमी, आकाश दीप आणि मुकेश कुमार यांच्या गोलंदाजीचा त्याने समाचार घेतला. शमीने १० षटकांत ७० धावा देत ३ बळी घेतले, आकाश दीपने ७८ धावा तर मुकेशने ५५ धावा खर्च केल्या. प्रत्युत्तरात बंगालचा डाव २४५ धावांत संपुष्टात आला. शाहबाज अहमदने नाबाद १०८ धावा केल्या, मात्र मोहम्मद सिराजच्या ४ बळींमुळे हैदराबादने सामना सहज जिंकला. अमन राव पेराला हा अमेरिकेच्या विस्कॉन्सिनमध्ये जन्मलेला (जून २००४) फलंदाज आहे, जो करीमनगरचा रहिवासी आहे. सय्यद मुश्ताक अली ट्रॉफीमध्ये त्याने १० सामन्यात २३४ धावा (स्ट्राईक रेट १६३+) केल्या होत्या. आयपीएल २०२६ च्या मिनी लिलावात राजस्थान रॉयल्सने त्याला आधारभूत किमतीत ३० लाख रुपयांना विकत घेतले. या द्विशतकानंतर राजस्थान रॉयल्सच्या चाहत्यांमध्ये आनंदाचे वातावरण आहे. अमनच्या या अफलातून खेळीने त्याला रातोरात स्टार बनवले आहे. फक्त तिसऱ्या लिस्ट ए सामन्यात द्विशतक ठोकणारा हा युवा फलंदाज भारतीय क्रिकेटच्या भविष्यातील मोठा चेहरा ठरू शकतो. चाहते आता आयपीएल २०२६ मध्ये त्याच्या पदार्पणाची उत्सुकतेने वाट पाहत आहेत!
