Todays Top 10 News: एक व्यक्ती बाहेर येण्याची धडपड करत होती; विमान अपघाताबाबत मिटकरींचा खळबळजनक दावा राष्ट्रवादी काँग्रेसचे नेते अजित पवार यांच्या विमान अपघाताबाबत आमदार अमोल मिटकरी यांनी पुन्हा एकदा गंभीर संशय व्यक्त केलाय. विमान कोसळत असताना त्यातून एक व्यक्ती बाहेर पडण्याचा प्रयत्न करत होती, असा दावा मिटकरी यांनी स्थानिक सरपंचाच्या हवाल्याने केलाय. गोजुबावीचे सरपंच कल्याण आटोळे यांच्या माहितीनुसार, अपघातग्रस्त विमानाचा दरवाजा उघडा होता आणि निळी पॅन्ट घातलेली एक व्यक्ती बाहेर येण्याची धडपड करत होती. मात्र, मदतीसाठी लोक पोहोचण्यापूर्वीच मोठा स्फोट झाला. सुरुवातीला सहा जणांचा मृत्यू झाल्याची माहिती समोर आली होती, परंतु प्रत्यक्षात पाचच मृतदेह सापडले. त्यामुळे तो ‘सहावा व्यक्ती’ कोण होता आणि तो कुठे गायब झाला, असा सवाल मिटकरींनी उपस्थित केला असून या प्रकरणाच्या सखोल चौकशीची मागणी केलीय. मुंबई-पुणे एक्सप्रेसवेवर गॅस गळती; 40 किमी वाहतूक कोंडी mumbai pune highway मुंबई-पुणे एक्सप्रेसवेवर खंडाळा घाटात मंगळवारी सायंकाळी प्रोपिलिन गॅसचा टँकर उलटल्याने गेल्या २४ तासांपासून वाहतुकीचा मोठा खोळंबा झालाय. या अपघातामुळे महामार्गावर तब्बल ४० किलोमीटरपर्यंत वाहनांच्या लांबच लांब रांगा लागल्या असून प्रवाशांचे प्रचंड हाल होत आहेत. गॅस अत्यंत ज्वलनशील आणि धोकादायक असल्याने प्रशासनाने सुरक्षेच्या कारणास्तव मुंबईकडे जाणारी वाहतूक पूर्णपणे रोखली होती. महामार्ग पोलीस अधीक्षक तानाजी चिखले यांनी दिलेल्या माहितीनुसार, टँकरमधील गॅस दुसऱ्या रिकाम्या टँकरमध्ये उपसण्याचे काम युद्धपातळीवर सुरू आहे. या प्रक्रियेनंतरच दुर्घटनाग्रस्त टँकर बाजूला हटवला जाईल. ही वाहतूक पूर्णपणे सुरळीत होण्यासाठी आणखी ६ ते ७ तास लागण्याची शक्यता वर्तवण्यात आली असून, तातडीचे काम नसल्यास नागरिकांना प्रवास टाळण्याचे आवाहन करण्यात आलेय. मनोज जरांगेंना जीवे मारण्याची धमकी; बीडमधील व्हायरल ऑडिओ क्लिपमुळे खळबळ manoj jarange मराठा आरक्षण आंदोलनाचे नेते मनोज जरांगे यांना गोळ्या घालून जिवे मारण्याची धमकी देणारी एक ऑडिओ क्लिप सोशल मीडियावर व्हायरल झाली असून, यामुळे राज्यभरात खळबळ उडालीय. या कथित संभाषणात एक व्यक्ती जरांगेंना संपवण्याची भाषा करत असून, माजी मंत्री धनंजय मुंडे आणि वाल्मिक कराड यांचा उल्लेख करत समर्थकांनाही धमकावताना ऐकू येत आहे. प्राथमिक माहितीनुसार, हा संवाद दोन मद्यधुंद व्यक्तींमधील असल्याचे समजते, मात्र धमकी देणारा व्यक्ती वाल्मिक कराड यांचा जवळचा असल्याचे सांगत आहे. या क्लिपमुळे जरांगे यांच्या सुरक्षेचा प्रश्न पुन्हा ऐरणीवर आलाय. अद्याप याप्रकरणी कोणतीही अधिकृत तक्रार दाखल झालेली नसून, संबंधित ऑडिओ क्लिपची सत्यता पोलिसांकडून तपासली जात आहे. मणिपूरमध्ये राष्ट्रपती राजवट समाप्त; युमनाम खेमचंद सिंह बनले मुख्यमंत्री Yumnam Khemchand Singh मणिपूरमध्ये तब्बल ३५६ दिवसांनंतर राष्ट्रपती राजवट हटवण्यात आली असून भाजप नेते युमनाम खेमचंद सिंह यांनी राज्याचे १३ वे मुख्यमंत्री म्हणून शपथ घेतली. राज्यपाल अजय कुमार भल्ला यांनी त्यांना पद आणि गोपनीयतेची शपथ दिली. राज्याच्या राजकीय इतिहासात प्रथमच दोन उपमुख्यमंत्र्यांची नियुक्ती करण्यात आली असून, नागा समुदायाचे लोसी दिखो आणि कुकी समुदायाच्या नेमचा किपगेन यांनी उपमुख्यमंत्रीपदाची जबाबदारी स्वीकारली. किपगेन या मणिपूरच्या पहिल्या महिला उपमुख्यमंत्री ठरल्यात. मैतेई आणि कुकी समुदायातील वांशिक हिंसाचारानंतर विस्कळीत झालेली शांतता पुन्हा प्रस्थापित करणे, हे नवनियुक्त सरकारपुढील मुख्य आव्हान असेल. मध्यममार्गी विचारसरणीचे नेते म्हणून ओळखले जाणारे खेमचंद सिंह आता एनडीए सरकारच्या माध्यमातून राज्यात नवीन राजकीय पर्वाची सुरुवात करत आहेत. 8व्या वेतन आयोगाबाबात मोठी अपडेट; सरकारने संसदेत केली घोषणा केंद्र सरकारी कर्मचारी आणि निवृत्ती वेतनधारकांसाठी एक अत्यंत महत्त्वाची बातमी समोर आली आहे. ८ व्या वेतन आयोगाच्या स्थापनेबाबत सरकारने संसदेत मोठी घोषणा केली असून, या आयोगाचे गठन ३ नोव्हेंबर २०२५ रोजीच झाल्याचे स्पष्ट केलेय. वित्त राज्यमंत्री पंकज चौधरी यांनी राज्यसभेत लेखी उत्तरात सांगितले की, आयोगाच्या कामकाजासाठी कार्यालय आणि कर्मचारी नियुक्तीची प्रक्रिया सुरू झालीय. हा आयोग पुढील १८ महिन्यांत आपला सविस्तर अहवाल सादर करेल, ज्यामध्ये वेतन श्रेणी, भत्ते आणि पेन्शनच्या पुनर्रचनेचा समावेश असेल. विशेष म्हणजे, निवृत्ती वेतनधारकांमध्ये कोणताही भेदभाव केला जाणार नसल्याची ग्वाही सरकारने दिलीय. या निर्णयामुळे कोट्यवधी कर्मचाऱ्यांच्या वेतनात मोठी वाढ होण्याची शक्यता निर्माण झालीय. सोने-चांदीच्या दरात मोठी उसळी; चांदी 14000 रुपयांनी महागली gold silver जागतिक बाजारपेठेतील घडामोडी आणि अमेरिका-इराणमधील वाढत्या भू-राजकीय तणावामुळे बुधवारी भारतीय सराफा बाजारात सोने आणि चांदीच्या किमतींनी नवा उच्चांक गाठला. ऑल इंडिया सराफा एसोसिएशनच्या माहितीनुसार, दिल्लीसह देशभरात चांदीच्या दरात तब्बल १४,३०० रुपयांची वाढ होऊन ती २,९८,३०० रुपये प्रति किलोवर पोहोचली आहे. सोन्याच्या दरातही ७,४०० रुपयांची भर पडल्याने १० ग्रॅम सोन्याचा भाव १,६५,१०० रुपयांच्या पार गेला आहे. गेल्या काही दिवसांतील घसरणीनंतर झालेली ही रिकव्हरी गुंतवणूकदारांसाठी आश्चर्यकारक ठरली असून डॉलरच्या कमकुवतपणामुळे सुरक्षित गुंतवणूक म्हणून मौल्यवान धातूंकडे कल वाढला आहे. तज्ज्ञांच्या मते, आंतरराष्ट्रीय अस्थिरता आणि अणू कराराबाबतच्या अनिश्चिततेमुळे आगामी काळातही किमतींमध्ये चढ-उतार कायम राहण्याची शक्यता आहे. गाझावर इस्रायलचा भीषण हल्ला; १० ठार, अनेक घरांची पडझड गाझा पट्टीमध्ये ३ आणि ४ फेब्रुवारीच्या मध्यरात्री इस्रायलने केलेल्या भीषण हवाई आणि जमिनीवरील हल्ल्यांनी पुन्हा एकदा हादरवून सोडले आहे. या ताज्या हल्ल्यांमध्ये किमान १० पॅलेस्टिनी नागरिकांचा मृत्यू झाला असून, मृतांमध्ये महिला आणि मुलांचा समावेश आहे. मध्य आणि दक्षिण गाझामधील निवासी भागांना लक्ष्य केल्यामुळे अनेक इमारती जमीनदोस्त झाल्या असून, ढिगाऱ्याखाली अद्याप काही लोक दबले असल्याची भीती व्यक्त होतेय. स्थानिक रुग्णालयांमध्ये जखमींची गर्दी झाली असून औषधोपचारांच्या अभावामुळे परिस्थिती बिकट बनलीय. संयुक्त राष्ट्रांनी या हल्ल्यांबाबत चिंता व्यक्त केली असतानाच, हमासने इस्रायलवर जाणीवपूर्वक नागरिकांना लक्ष्य केल्याचा आरोप केलाय. दुसरीकडे, इस्रायलने आपले सैन्य केवळ हमासच्या तळांवर कारवाई करत असल्याचा दावा केलाय. युद्धविरामाचे आंतरराष्ट्रीय प्रयत्न सुरू असतानाच गाझामधील ‘सेफ झोन’मध्येही बॉम्बफेक झाल्याने नागरिकांमध्ये दहशतीचे वातावरण आहे. व्हॉट्सॲपवर आली ट्रॅफिक चलनाची लिंक; दिल्लीतील व्यक्तीचे 4 लाख रुपये लंपास ऑनलाइन फसवणुकीचे नवनवीन प्रकार समोर येत असतानाच आता ट्रॅफिक चलनाचे बनावट मेसेज पाठवून सर्वसामान्यांची लूट केली जात आहे. दिल्लीतील एका व्यक्तीला व्हॉट्सॲपवर ट्रॅफिक चलनाची एक लिंक आली होती. ही लिंक अधिकृत असल्याचा भास निर्माण करून त्याला एका बनावट ॲपची APK फाईल लिंक पाठवण्यात आली. संबंधित व्यक्तीने त्यावर क्लिक करताच त्याच्या फोनचा ताबा सायबर चोरांकडे गेला. या माध्यमातून चोरांनी त्याच्या क्रेडिट कार्डची माहिती चोरून सुमारे ४ लाख रुपयांचे गिफ्ट कार्ड्स खरेदी केले. विशेष म्हणजे, या व्यवहारांचे ओटीपी देखील चोरांनी परस्पर मिळवले. नागरिकांनी अशा कोणत्याही अनधिकृत लिंकवर क्लिक करू नये, असे आवाहन पोलिसांनी केलेय. ‘धुरंधर 2’ मध्ये यामी गौतमची एन्ट्री; बॉक्स ऑफिसवर ‘टॉक्सिक’ सोबत टक्कर yami gautami dhurandhar रणवीर सिंगच्या बहुप्रतिक्षित ‘धुरंधर २: द रिव्हेंज’ या चित्रपटाची सध्या जोरदार चर्चा सुरू असून, आता यामध्ये अभिनेत्री यामी गौतमची एन्ट्री झालीय. यामी या चित्रपटात महत्त्वपूर्ण कॅमिओ भूमिकेत दिसणार असून, तिने ५ दिवसांचे शूटिंगही पूर्ण केले आहे. विशेष म्हणजे या भूमिकेत ती जबरदस्त ॲक्शन करताना दिसेल, जी कथेला एक नवीन वळण देईल. ‘धुरंधर’च्या पहिल्या भागाने जागतिक स्तरावर विक्रमी कमाई केल्यानंतर आता या दुसऱ्या भागाकडून प्रेक्षकांना मोठ्या अपेक्षा आहेत. हा चित्रपट १९ मार्च रोजी प्रदर्शित होत असून, त्याच दिवशी दाक्षिणात्य सुपरस्टार यशचा ‘टॉक्सिक’ देखील भेटीला येणार आहे. या दोन मोठ्या चित्रपटांच्या निमित्ताने बॉक्स ऑफिसवर मोठी चुरस पाहायला मिळणार आहे. अफगाणिस्तानने रचला इतिहास! भारताविरुद्ध एकाच सामन्यात दोन शतकं अंडर-१९ वर्ल्ड कप २०२६ च्या सेमीफायनलमध्ये अफगाणिस्तानने भारताविरुद्ध ३१० धावांचा डोंगर उभा करत इतिहास रचलाय. ३८ वर्षांच्या इतिहासात पहिल्यांदाच भारताविरुद्ध एकाच सामन्यात दोन फलंदाजांनी शतके झळकावली. फैसल शिनोझादा (११०) आणि उजैरुल्लाह नियाझी (१०१) या जोडीने भारतीय गोलंदाजांचा धुव्वा उडवला. यापूर्वी २०१० मध्ये बेन स्टोक्सने भारताविरुद्ध शतक झळकावले होते. शिनोझादा आणि नियाझी यांच्या १४८ धावांच्या भागीदारीमुळे भारतासमोर ३११ धावांचे कठीण लक्ष्य ठेवले गेलेय, जे अंडर-१९ विश्वचषकात भारताविरुद्धचा सर्वोच्च स्कोअर आहे.
