Shivsena – MIM Yuti : महाराष्ट्रातील महापालिका निवडणुकांमध्ये शिवसेना (शिंदे गट) आणि भाजप यांना मोठे यश मिळाले असतानाच, ऑल इंडिया मजलिस-ए-इत्तेहादुल मुस्लिमीन (एमआयएम) ने देखील जबरदस्त कामगिरी केली आहे. राज्यात एमआयएम दुसऱ्या क्रमांकाचा किंवा प्रमुख विरोधी पक्ष म्हणून उदयास आला आहे. मालेगाव, छत्रपती संभाजीनगर, नांदेड, अमरावती, धुळे आदी ठिकाणी पक्षाने मोठ्या संख्येने जागा जिंकल्या आहेत. विशेषतः मालेगाव महानगरपालिकेत एमआयएमने २१ नगरसेवक निवडून आणले आहेत. या पार्श्वभूमीवर एमआयएमचे नेते आणि माजी खासदार इम्तियाज जलील यांनी एक मोठा दावा केला आहे, ज्यामुळे राजकीय वर्तुळात खळबळ उडाली आहे. नेमके काय म्हणाले इम्तियाज जलील? जलील यांनी सांगितले की, “मालेगाव सारख्या ठिकाणी आमचे २१ नगरसेवक निवडून आले आहेत. तिथे महापौर करण्यासाठी एकनाथ शिंदे यांच्याकडून स्थानिक नेत्यांना एक प्रस्ताव आला होता – ‘आपण सोबत येऊ शकता का?’ असा हा प्रस्ताव होता. परंतु आमचे तिकडचे स्थानिक आमदार आणि नेत्यांनी ठामपणे नकार दिला. आम्ही भाजप सोबत किंवा शिवसेना (शिंदे गट) सोबत जाणार नाही, असे स्पष्ट पत्रकार परिषदेत सांगितले.” या दाव्यामुळे महायुतीतील सत्तासमीकरणांवर नवे प्रश्न उपस्थित झाले आहेत. भाजप विरोधात एकत्र येण्याची शक्यता जलील यांनी पुढे म्हटले की, राज्यातील तीन ते चार महापालिका अशा आहेत जिथे भाजपला सत्तेपासून दूर ठेवण्यासाठी प्रयत्न सुरू आहेत. “वेळ पडली तर सर्व पक्ष एकत्र येतील. पक्षाचे अध्यक्ष असदुद्दीन ओवेसी यांनी स्पष्ट सांगितले आहे की, सन्मानाने तुम्ही आमचा सपोर्ट मागत असाल तर नक्कीच आम्ही पॉझिटिव्ह विचार करू.” एमआयएमने भाजपबरोबर सत्ता भागीदारी न करण्याची भूमिका स्पष्ट केली आहे. नोटा उधळण्याच्या आरोपावर स्पष्टीकरण दरम्यान, विजयानंतर झालेल्या जल्लोष कार्यक्रमात नोटा उधळण्याचा व्हिडीओ व्हायरल झाला होता. यावर जलील यांनी प्रतिक्रिया देताना म्हटले, “त्या ठिकाणी आमचे निवडून आलेले ३३ नगरसेवक उपस्थित होते. जल्लोषाचा कार्यक्रम होता. एका गायकाला बोलावले होते. काही उत्साही लोकांनी पैसे उधळले. यात मी किंवा पक्षाने काही मोठा गुन्हा केला असा मला वाटत नाही. ही सामान्य उत्साहाची बाब आहे.” एमआयएमची कामगिरी महापालिका निवडणुकांमध्ये एमआयएमने राज्यभरात १००+ जागा जिंकल्या आहेत. मालेगावमध्ये २१, छत्रपती संभाजीनगरमध्ये ३३, नांदेडमध्ये १४, अमरावतीमध्ये १३ इत्यादी ठिकाणी पक्षाने मजबूत कामगिरी केली आहे. मुंबईतही पक्षाला पहिल्यांदाच जागा मिळाल्या आहेत. इम्तियाज जलील यांच्या या खुलाश्यामुळे महाराष्ट्राच्या स्थानिक राजकारणात नवे वळण लागण्याची शक्यता आहे. आता शिंदे गट आणि भाजप यावर काय प्रतिक्रिया देतात, याकडे सर्वांचे लक्ष लागले आहे.
