Shikhar Dhawan Marriage : भारतीय क्रिकेट संघाचा माजी सलामीवीर आणि ‘गब्बर’ म्हणून प्रसिद्ध असलेला शिखर धवन लवकरच दुसऱ्यांदा लग्नबंधनात अडकणार आहे. त्याची लाँगटाइम गर्लफ्रेंड सोफी शाइन हिच्यासोबत फेब्रुवारी २०२६ मध्ये भव्य लग्नसोहळा होणार असल्याची माहिती समोर आली आहे. हा सोहळा फेब्रुवारीच्या तिसऱ्या आठवड्यात दिल्ली-एनसीआरमध्ये आयोजित केला जाणार आहे. या लग्नात क्रिकेट विश्वातील दिग्गज आणि बॉलीवूडच्या सेलिब्रिटींची उपस्थिती अपेक्षित आहे. शिखर धवन स्वतः लग्नाच्या तयारीत सक्रियपणे सहभागी आहे. सूत्रांच्या मते, ही जोडी ही नवी सुरुवात आनंद आणि कृतज्ञतेने साजरी करत आहे. लग्नाच्या तयारीला अनेक महिने झाले असून, शिखर प्रत्येक गोष्टीकडे वैयक्तिक लक्ष देत आहे जेणेकरून सेलिब्रेशनमध्ये काहीही कमी राहू नये. नात्याची सुरुवात आणि अफवा शिखर आणि सोफीच्या नात्याबद्दल गेल्या काही महिन्यांपासून अटकळबाजी सुरू होती. आयसीसी चॅम्पियन्स ट्रॉफी २०२५ दरम्यान दुबईत झालेल्या सामन्यांमध्ये शिखर स्टँडमध्ये सोफी शाइनसोबत दिसला होता. तेव्हा ‘गब्बर’सोबत असलेल्या रहस्यमय महिलेबद्दल चाहत्यांमध्ये उत्सुकता निर्माण झाली होती. सोशल मीडियावर त्यांच्या फोटोंमुळे आणि सार्वजनिक हजेरीमुळे नाते अधिकच कन्फर्म झाले. रिपोर्ट्सनुसार, शिखर आणि सोफीची पहिली भेट काही वर्षांपूर्वी दुबईत एका रेस्टॉरंटमध्ये झाली. सुरुवातीला मैत्री असलेले हे नाते हळूहळू प्रेमात बदलले. आयपीएल २०२४ दरम्यान सोफी अनेक सामन्यांमध्ये दिसली होती. मे २०२५ मध्ये त्यांनी सोशल मीडियावर एकत्र फोटो शेअर करून नाते अधिकृत केले. शिखर धवनचे वैयक्तिक जीवन शिखर धवनचे पहिले लग्न २०१२ मध्ये ऑस्ट्रेलियन किकबॉक्सर आयेशा मुखर्जी हिच्यासोबत झाले होते. आयेशा शिखरपेक्षा वयाने मोठी होती. त्यांना झोरावर नावाचा मुलगा आहे, जो सध्या ११ वर्षांचा आहे. मात्र, २०२३ मध्ये त्यांचा घटस्फोट झाला. कोण आहे सोफी शाइन? सोफी शाइन ही आयरिश नागरिक आहे आणि व्यावसायिकदृष्ट्या यशस्वी महिला आहे. ती सध्या अबू धाबीमध्ये नॉर्दर्न ट्रस्ट कॉर्पोरेशनमध्ये सेकंड व्हाइस प्रेसिडेंट म्हणून काम करते. तिने आयर्लंडमधील कॅसलरॉय कॉलेज आणि लिमरिक इन्स्टिट्यूट ऑफ टेक्नॉलॉजीमधून मार्केटिंग आणि मॅनेजमेंटमध्ये पदवी घेतली आहे. ती प्रोडक्ट कन्सल्टंट म्हणूनही ओळखली जाते. ती तिच्या सोशल मीडिया प्रोफाइलवर ग्लॅमरस फोटो आणि स्टायलिश लूकमुळे मोठ्या प्रमाणात चर्चेत असते.
