1. जागावाटपावर फडणवीस-शिंदे चर्चा आज ! भाजप-शिवसेना युतीच्या जागावाटपाच्या हालचालींना वेग आला असून, मुख्यमंत्री देवेंद्र फडणवीस आणि शिवसेना पक्षप्रमुख एकनाथ शिंदे यांच्यात आज बैठक होणार आहे. त्यानंतर युती, जागावाटपाचा निर्णय जाहीर होईल. युती झाली तर अनेक इच्छुकांना उमेदवारी अर्ज मागे घ्यावा लागणार आहे. त्यामुळे एबी फाॅर्म मिळूनही हाती निराशा येणाऱ्या शिवसैनिकांसह भाजपच्या इच्छुकांमध्ये धाकधुक वाढली आहे. भाजप शिवसेनेला १५ जागा देण्यास तयार होते, मात्र शिवसेना २५ जागांवर ठाम होती. उमेदवारी अर्ज दाखल करण्याची मुदत संपली तरी शिवसेना-भाजप युतीतील जागावाटपाचा तिढा सुटत नव्हता. त्यामुळे दोन्ही पक्षांनी ताकद असलेल्या प्रभागात एबी फाॅर्म दिले आहेत दुसरीकडे माघारीच्या दिवशी अर्ज मागे घेण्याची वेळ येणार तर नाही ना? याची धाकधुकही शिवसैनिकांसह भाजपच्या काही उमेदवारांमध्ये आहे. 2. पन्नास मतदारसंघात आघाडीचे उमेदवार आमने-सामने महापालिका निवडणुकीत महाविकास आघाडी म्हणून काॅग्रेस, ठाकरेंची शिवसेना आणि मनसे हे तीन पक्ष एकत्र लढणार होते. त्यासाठी अर्ज भरण्याच्या शेवटच्या दिवसापर्यंत चर्चा होऊन एकत्र लढण्याचा निर्णय झाला असला तरी अर्ज भरण्यासाठी शेवटचे काही तास शिल्लक असताना एबी फाॅर्म देताना तिन्ही पक्षांचा गोंधळ झाला. त्यामुळे महापालिकेस आघाडीतील या तीनही पक्षांनी १६५ जागांसाठी तब्बल २०४ उमेदवारांना एबी फाॅर्म दिलेत. यामुळे महाविकास आघाडीचे तब्बल ५० उमेदवार एकमेकांच्या समोर उभे राहणार असून त्याचा फायदा थेट भाजपला होण्याची शक्यता आहे. दरम्यान, या निवडणुकीत शेवटच्या दिवशी काॅग्रेसकडून ९० उमेदवार, शिवसेना ठाकरे गटाकडून ७१ उमेदवार तर मनसेकडून ४४ उमेदवारांना एबी फाॅर्म देण्यात आलेत. त्यामुळं महाविकास आघाडीचे १६५ जागांवर तब्बल २०५ उमेदवार निवडणुकीच्या रिंगणात उतरलेत. 3. उमेदवाराने ‘AB फॉर्म’ फाडला अन् चक्क चावून खाल्ला महापालिका निवडणुकीत राजकीय पक्षांकडून एकाच जागेवर दोन उमेदवारांना एबी फाॅर्म देण्यात आल्याने छाननीच्या वेळी मोठा गोंधळ पाहायला मिळाला. धनकवडी- सहकारनगर क्षेत्रीय कार्यालयाकडील प्रभाग ३६ (अ) मध्ये छाननीच्या वेळी शिवसेनेच्या उमेदवाराने आपल्याच पक्षाने दुसऱ्या उमेदवाराला दिलेला एबी फाॅर्म छाननीच्या वेळी हिसकावून घेत चक्क खाऊन टाकला. त्यामुळे मोठी गोंधळाची स्थिती निर्माण झाली.या प्रकरणाची गंभीर दखल घेत निवडणूक निर्णय अधिकाऱ्यांकडून पोलिसांमध्ये तक्रार दाखल करण्यात आली आहे. उद्धव कांबळे, असं या अर्ज फाडलेल्या उमेदवाराचं नाव असल्याचं महापालिकेच्या निवडणूक विभागाकडून सांगण्यात आलंय. मात्र, या प्रकारामुळे चांगलाच गोंधळ उडाला असून, राजकीय वर्तुळात चांगलीच खळबळ उडालीय. 4. शेवटच्या दिवशी २ हजार ३०० अर्जांचा पाऊस अर्ज भरण्याच्या शेवटच्या दिवशी म्हणजे काल निवडणूक कर्मचाऱ्यांना ‘ओव्हरनाइट’ ड्युटी करावी लागली. या कर्मचाऱ्यांना अर्ज तपासणीसाठी सकाळी सात पर्यंत थांबावे लागले. एकूण अर्ज भरण्याच्या मुदतीत ३०४१ अर्ज दाखल झाले असून, त्यातील २३०० अर्ज हे केवळ शेवटच्या दिवशी म्हणजे ३० डिसेंबर रोजी दाखल झाले आहेत. अर्ज भरण्याची मुदत २३ ते ३० डिसेंबर पर्यंत होती. २८ डिसेंबरपर्यंत कोणत्याही पक्षाचे उमेदवारी देण्याचे चित्र स्पष्ट नव्हते. पक्षप्रवेश, इच्छुकांची पळवापळवीच सुरू होती. २९ तारखेला उमेदवारांना पक्षांनी यादी जाहीर न करता थेट एबी फाॅर्म द्यायला सुरुवात केली. त्यामुळे अधिकच गोंधळ निर्माण झाला. इच्छुक चातकाप्रमाणे एबी फाॅर्मची वाट पाहात होते. त्यानुसार आता सर्व पक्षाकडून शेवटच्या दिवशी २ हजार ३०० अर्जांचा पाऊस पडलाय. 5. महापालिका निवडणुकीत टपाली मतदानाचा नवा विक्रम महापालिका निवडणुकीसाठी तब्बल ३० हजार कर्मचाऱ्यांनी टपाली मतपत्रिकांची मागणी नोंदविली आहे. त्यामुळे यंदा पुण्यात सर्वाधिक टपाली मतदान होणार आहे. पुणे, पिंपरी-चिंचवड महापालिकेसाठी या कर्मचाऱ्यांची निवडणूक कर्मचारी म्हणून नेमणूक झालीय. त्यानुसार, प्रशासनाने तयारी करण्याच्या सूचना पालिका आयुक्त नवल किशोर राम यांनी दिल्या. आयुक्तांनी निवडणूक तयारीचा आढावा घेतला. प्रशासनाने निवडणुकीसाठी केलेल्या तयारीची माहितीही आयुक्तांनी घेतलीय. अतिरिक्त महापालिका आयुक्त (विशेष) ओमप्रकाश दिवटे, उपायुक्त निवडणूक प्रसाद काटकर यावेळी उपस्थित होते. निवडणूक कामकाजासाठी पालिकेने २४ समंन्वय अधिकारी नेमले असून त्यांनी निवडणूक तयारीचं सादरीकरण केलं. 6. एका जागेवर दोन एबी फॉर्म? काल क्षेत्रीय कार्यालयात अर्जांच्या छाननी वेळी अनेक प्रमुख उमेदवारांच्या कागदपत्रांवर आक्षेप घेण्यात आले. त्यात प्रभाग ७ मधील भाजपच्या उमेदवार रेश्मा भोसले यांच्या मिळकत कराच्या ना हरकत प्रमाणावर आक्षेप घेतला. प्रभाग २२ मधील काॅग्रेसचे उमेदवार अविनाश बागवे यांच्या प्रतिज्ञापत्र तसेच विवाह नोंदणीच्या कागदपत्रांवर आक्षेप घेतला, तर प्रभाग २ मध्ये माजी उपमहापौर डाॅ. सिद्धार्थ धेंडे यांच्या पत्नीच्या कागदपत्रांवर आक्षेप घेण्यात आला. प्रभाग २७ मध्ये राष्ट्रवादीचे शहराध्यक्ष सुभाष जगताप उमेदवार धनंजय जाधव यांच्या कागदपत्रांवरही आक्षेप घेतला. त्याची सुनावणी रात्रीउशीरापर्यंत चालली होती. 7. मतदानापूर्वीच भाजपचे 6 उमेदवार बिनविरोध भाजपने नगरपालिकेप्रमाणेच महापालिका निवडणुकीत विजयी सलामी दिली असून भाजपचे राज्यभरातून 6 उमेदवार विजयी झालेत. भाजप प्रदेशाध्यक्ष असलेल्या कल्याण-डोंबिवली महापालिकेतून भाजपचा विजयाचा श्रीगणेशा केलाय. कल्याण-डोंबिविलीत भाजपचे तीन उमेदवार विजयी झाले असून तिन्ही उमेदवार महिला आहेत. त्यामुळे, भाजपच्या विजयाचे खाते महिलांनी खोलले. तर, कल्याण-डोंबिवलीनंतर धुळे महापालिकेत 2 आणि पनवेल महापालिकेत 1 असे एकूण 6 उमेदवार बिनविरोध झाले आहेत. त्यामुळे, उमेदवारी अर्ज भरल्याच्या दुसऱ्याच दिवशी भाजपने विजयाचा षटकार ठोकला आहे, असे म्हटलं तर वावगं ठरणार नाही. भाजप प्रदेशाध्यक्ष रविंद्र चव्हाण यांच्या नेतृत्वात कल्याण डोंबिवलीतील 3 प्रभागात 3 महिला उमेदवार बिनविरोध ठरल्या आहेत. 8. शौर्य दिनानिमित्त विजयस्तंभाला अजित पवारांकडून अभिवादन भीमा कोरेगावात आज 208 वा शौर्य दिन मोठ्या उत्साहात साजरा होतोय. शौर्य दिनानिमित्त लाखो भीम अनुयायी राज्यभरातून विजयस्तंभाला अभिवादन करण्यासाठी दाखल झालेत. पुणे जिल्ह्याचे पालकमंत्री अजित पवारांनी भीमा कोरेगावात जाऊन विजयस्तंभाला अभिवादन केले. वंचित बहुजन आघाडीचे अध्यक्ष प्रकाश आंबेडकर यांनीही विजयस्तंभाला अभिवादन केले. प्रशासनाकडून तयार करण्यात आलेली तयारी पाहून प्रकाश आंबेडकर यांनी समाधान व्यक्त केलं. जातीप्रता, व्यवस्थेच्या विरोधातील हा एक लढा होता, असंही प्रकाश आंबेडकर यांनी सांगितले. यावेळी अजित पवारांनी अभिवादन करण्यासाठी करून प्रशासनानं जोरदार तयारी केल्याचं यावेळी सांगितलं. 9. पंतप्रधानांकडून देशवासियांना नववर्षाच्या शुभेच्छा आज जगभरात नवीन वर्ष साजरं केलं जातंय. राष्ट्रीय राजधानी दिल्ली व्यतिरिक्त, मुंबई, बेंगळुरू आणि लखनऊसह प्रमुख शहरे नवीन वर्षाचे स्वागत उत्साहात करण्यात आलं. यानिमित्ताने, पंतप्रधान नरेंद्र मोदींसह अनेक प्रमुख नेत्यांनी देशवासियांना २०२६ या वर्षाच्या शुभेच्छा दिल्यात. पंतप्रधान मोदींनी देशवासियांना २०२६ या नवीन वर्षाच्या शुभेच्छा दिल्या आहेत. त्यांनी सोशल मीडियावर पोस्ट करत केलीय.ज्यामध्ये त्यांनी, “२०२६ साठी तुम्हा सर्वांना हार्दिक शुभेच्छा. येणारे वर्ष तुम्हाला चांगले आरोग्य आणि समृद्धी देईल. तुमच्या प्रयत्नांमध्ये तुम्हाला यश मिळो आणि तुमची सर्व कामे पूर्ण होवोत. आपल्या समाजात शांती आणि आनंदासाठी प्रार्थना करतो.”असं म्हटलंय. 10. रशियाला युद्ध जिंकण्याचा विश्वास-व्लादिमिर पुतिन रशियाचे राष्ट्राध्यक्ष व्लादिमिर पुतिन यांनी नवीन वर्षाच्या पूर्वसंध्येला राष्ट्राला संबोधित केले. युक्रेनमधील सुरू असलेल्या युद्धाबाबत त्यांनी रशियाला युद्ध जिंकण्याचा विश्वास असल्याचं म्हटलंय. जगातील सर्वात शक्तिशाली नेत्यांपैकी एक मानले जाणारे पुतिन यांनी रशियन लोकांना विश्वास देत, “आम्हाला तुमच्यावर आणि आमच्या विजयावर विश्वास आहे. आम्हाला आमच्या लष्करी कर्मचाऱ्यांना पाठिंबा दिला पाहिजे.”असं म्हटलंय. . पुतिन यांनी युक्रेनमधील रशियन सैनिकांना आणि कमांडरनाही यावेळी नवीन वर्षाच्या शुभेच्छा दिल्या. रशिया जवळजवळ चार वर्षांपासून युक्रेनवर आक्रमण करत आहे.
