निवडणुकीच्या प्रचाराचा ‘सुपर संडे’! महापालिका निवडणुकीच्या प्रचाराला सर्वच पक्षाच्या उमेदवारांनी जंगी सुरुवात केली असून, प्रभागनिहाय चित्र स्पष्ट झाल्यानंतर आलेला पहिलाच रविवार उमेदवारांनी पदयात्रा आणि घरोघरी भेटी देऊन सत्कारणी लावला.पहिल्याच रविवारी सर्वपक्षीय कार्यकर्त्यांनी अधिकाधिक मतदारापर्यंत पोहोचण्याचा प्रयत्न केला. काहींनी पदयात्रा काढल्या, तर काहींनी घरोघर भेटी दिल्या. काही पक्षांनी नेत्यांचे रोड शो केले. शिवसेना (उबाठा) जिल्हा संपर्कप्रमुख सचिन आहिर यांचा रोड शो आणि राष्ट्रवादी काँग्रेसचे अध्यक्ष अजित पवार यांची सभा हे प्रचाराचे शुभारंभ ठरले. याशिवाय अन्य पक्षांनीही स्टार प्रचारकांच्या सभांचे नियोजन केले आहे. २९ महापालिकांमध्ये निवडणूक होत असल्याने स्टार प्रचारकांच्या तारखा मिळवणे, सभा आयोजित करणे, हा पक्षांपुढील मोठा टास्क आहे. मतपेट्यांची जबाबदारी आता ‘पीएमपी’वर महापालिका निवडणुकीसाठी १५ जानेवारीला मतदान होत असून पुणे, पिंपरी-चिंचवडमध्ये मतपेट्या वाहून नेण्यासाठी निवडणूक आयोगाने पुणे महानगर परिवहन महामंडळाकडे (पीएमपी) १ हजार १०० बसची मागणी केलीय. त्यानुसार पीएमपी बसचे नियोजन करत आहे. लोकसभा, विधानसभा, महापालिकेच्या मतदानासाठी पीएमपीकडून मतपेट्या वाहून नेण्यासाठी बससेवा पुरविण्यात येते. त्यासाठी निवडणूक नियोजन अधिकारी मतदार केंद्रानुसार पीएमपीकडे किती बस लागतील, याची माहिती देतात. त्यानुसार पीएमपी मतपेट्या वाहून नेण्यासाठी बस पुरविते यावेळी पुणे, पिंपरी-चिंचवडमध्ये एकाच दिवशी मतदान आहे. निवडणूक आयोगाने पुण्यासाठी ७०० आणि पिंपरी चिंचवडसाठी ४०० बसची मागणी केली आहे. त्या दृष्टीने पीएमपीकडून नियोजन करण्यास सुरुवात केली आहे. आयोगाचे ४० ॲप्स आता एकाच ठिकाणी! केंद्रीय निवडणूक आयोगाने ईसीआयनेट हे ॲप विकसित केलंय. निवडणूक आयोगाच्या आधीच्या ४० हून अधिक स्वतंत्र ॲप्स आणि वेबसाइट्सना एकाच छताखाली आणून हे नवीन एकच ॲप तयार करण्यात आलंय. या ॲपमुळे मतदार यादीत नाव नोंदविणे, नावात बदल करणे, तसंच मतदान केंद्र कुठे आहे आणि तिथे जाण्याचा मार्ग काय आहे, हे सहज शोधता येणार आहे.याशिवाय लोकसभा आणि विधानसभा निवडणुकीच्या मतदानाची टक्केवारीची माहितीही मिळणार आहे. मुख्य निवडणूक अधिकारी, जिल्हा निवडणूक अधिकारी, निवडणूक नोंदणी अधिकारी, निरीक्षक आणि क्षेत्रीय अधिकाऱ्यांच्या अभिप्रायाच्या आधारे या ॲपमध्ये सुधारणा करण्यात आल्या आहेत. आता नागरिकांकडून मिळालेल्या सूचनांचेही परीक्षण करून ॲपला आणखी सोपे करण्यात येणार आहे. या महिन्याच्या शेवटी या ॲपचा अधिकृत शुभारंभ करण्यात येणार असल्याचं आयोगानं म्हटलंय. राजकारण क्षणाक्षणाला बदलतंय, भविष्यात काहीही घडू शकतं -निलेश लंके राज्यातील महापालिका निवडणुकीसाठी अनेक पक्षांनी युती केल्यात. यातच पुन्यतिल दोन्ही राष्ट्रवादी एकत्र येऊन निवडणुकीला सामोरे जात आहेत . याविषयीच बोलताना राष्ट्रवादी काँग्रेसचे दोन्ही गट पुन्हा एकत्र आल्यास उपमुख्यमंत्री अजित पवार यांच्यासह ज्येष्ठ नेते शरद पवार यांनाही समाधान वाटेल, असं वक्तव्य खासदार निलेश लंके यांनी केलंय. पुणे आणि पिंपरी-चिंचवडचा विकास हा शरद पवार यांच्या नेतृत्वामुळे झाला असून अजित पवारांनीही त्यांच्या पावलावर पाऊल ठेवत विकासाची कामे केलीत. त्यामुळे भविष्यात दोन्ही राष्ट्रवादी पुन्हा एकत्र आल्यास हा निर्णय सर्वसामान्य नागरिकही स्वीकारतील, असा विश्वासही त्यांनी व्यक्त केला. त्यासोबतच राजकारण हे क्षणाक्षणाला बदलत असते. त्यामुळे कोणतेही ठाम भाकीत करता येत नाही. वाट पाहू आणि बघू, असे सांगत लंके यांनी दोन्ही राष्ट्रवादी एकत्र येण्याविषयीचा सूचक इशाराच दिलाय. निवडणूक आयोगाने जाहीर केलं खर्चाचं दरपत्रक महापालिकेच्या रणांगणात राज्य पातळीवरील वरिष्ठ नेते प्रचारात सक्रिय झाले आहेत. काँग्रेस, राष्ट्रवादी काँग्रेस, भाजप, दोन्ही शिवसेना आदी पक्षांचे नेते विमानाने किंवा हेलिकॉप्टरने उमेदवारांच्या प्रचारासाठी येणार असल्याचे गृहीत धरून निवडणूक आयोगाने या हवाई सफरीचेही दरपत्रक जाहीर केलंय. त्याचसोबत शाकाहारी, मांसाहारी भोजन, झेंडे, फलकापासून ते अगदी वाद्यांपर्यंतचे दर निश्चित केलेत. त्या दरानुसारच उमेदवार व राजकीय पक्षांना खर्च सादर करावा लागणार आहे. त्या दरानुसार उमेदवारांना खर्च सादर करावा लागणार आहे. .एका प्रभागात चार उमेदवार असल्याने त्यांना १३ लाखांप्रमाणे ५२ लाखांपर्यंत खर्च करता येईल. पण आयोगाला हिशेब मात्र स्वतंत्ररीत्या द्यावा लागणार आहे. महानगरपालिका रणसंग्राम आता मोबाईलच्या स्क्रीनवर पिंपरी–चिंचवड महानगरपालिका निवडणुकीची चाहूल लागताच सोशल मीडियावर राजकीय चर्चांना अचानक वेग आला आहे. फेसबुक, इंस्टाग्राम, एक्स (ट्विटर), व्हॉट्सअॅप सारख्या प्लॅटफॉर्मवर विविध पोस्ट, व्हिडिओ आणि कमेंट्सच्या माध्यमातून समर्थक, कार्यकर्ते आणि मतदार आपापली मते नोंदवत आहेत. डिजिटल विश्वात निवडणुकीचे तापमान चांगलेच वाढले आहे. विविध राजकीय पक्षांचे नेते, इच्छुक उमेदवार आणि त्यांचे समर्थक सातत्याने पोस्ट, रील्स, स्टेटस आणि लाईव्ह चर्चांच्या माध्यमातून मतदारांपर्यंत पोहोचण्याचा प्रयत्न करत आहेत. पिंपरी–चिंचवड महापालिका निवडणुकीच्या पार्श्वभूमीवर शहरातील राजकीय वातावरण चांगलेच रंगत आले असून त्याचा सर्वाधिक ठसा सोशल मीडियावर उमटताना दिसत आहे. आज उद्धव ठाकरे-राज ठाकरे यांची पहिली संयुक्त सभा मुंबई पालिका निवडणुकीच्या पार्श्वभूमीवर आज शिवसेना (उद्धव बाळासाहेब ठाकरे) प्रमुख उद्धव ठाकरे आणि मनसे अध्यक्ष राज ठाकरे यांची पहिली संयुक्त सभा पार पडणार आहे. ही सभा विक्रोळीत होणार आहे. आगामी काळात दोन्ही नेत्यांच्या सात ते आठ संयुक्त सभा नियोजित असून, त्यातील पहिली सभा आज पूर्व उपनगरात होत आहे. विशेष म्हणजे, शिवसेना आणि मनसेच्या शाखांना देखील उद्धव आणि राज ठाकरे एकत्रितपणे भेटी देणार आहेत. तर दुसरीकडे, अमित ठाकरे आणि आदित्य ठाकरे हेही मुंबईत दोन संयुक्त सभा घेणार आहेत. काँग्रेस खासदार प्रणिती शिंदे भाजपात जाणार स्थानिक स्वराज्य संस्थेच्या निवडणुकीच्या दरम्यान महायुतीमध्ये मोठी इनकमिंग सुरूय. याच दरम्यान एका राजकीय बातमीमुळे सोलापूरसह राज्याच्या राजकारणातएकाच खळबळ उडालीय. महापालिका निवडणुकीनंतर काँग्रेस खासदार प्रणिती शिंदे ह्या भाजपमध्ये जाणार आहेत. खासदार शिंदे आणि मुख्यमंत्री देवेंद्र फडणवीस यांच्याशी त्यांची डील झालीय असा मोठा दावा वंचित बहुजन आघाडीचे युवा नेते सुजात आंबेडकर यांनी केलाय. या दाव्यामुळे सोलापूरसह राज्यातील राजकारणात मोठे उलटफेर पाहायला मिळणारेत. वंचित बहुजन आघाडीने सोलापूर महापालिकेसाठी २२ उमेदवार निवडणुकीत रिंगणात उतरवलेत. त्यांच्या प्रचारार्थ सुजात आंबेडकरांनी सोलापुरात आयोजित सभेत हा मोठा दावा करत पुन्हा एकदा खासदार प्रणिती शिंदे यांच्यावर आरोप केलेत. उमर खालिद, शरजील इमाम यांचा आज फैसला पाच वर्षांहून अधिक काळ तुरुंगात असलेले विद्यार्थी कार्यकर्ते उमर खालिद आणि शरजील इमाम हे तुरुंगातून बाहेर येणार कि नाही याचा निर्णय आज होणार आहे. २०२० च्या दिल्ली दंगलीशी संबंधित प्रकरणात खालिद आणि इमाम यांच्यासह पाच इतर आरोपींच्या जामीन अर्जांवर सर्वोच्च न्यायालय आज आपला निर्णय देणार आहे. न्यायाधीश रविंदर कुमार आणि एन.व्ही. अंजारिया यांच्या खंडपीठाने १० डिसेंबर रोजी आरोपी आणि दिल्ली पोलिसांचा युक्तिवाद ऐकल्यानंतर आपला निर्णय राखून ठेवला होता. त्यावरच आज निर्णय होणार आहे. उमर खालिद, शरजील इमाम, गुल्फिशा फातिमा, मीरान हैदर, शिफा उर रहमान, मोहम्मद सलीम खान आणि शादाब अहमद यांच्यावर फेब्रुवारी २०२० मध्ये झालेल्या दिल्ली दंगलींचे ‘मास्टरमाइंड’ असल्याचा आरोप आहे. पुन्हा भारतावरील टॅरिफ वाढवू शकतो – ट्रम्प अमेरिकेचे राष्ट्राध्यक्ष डोनाल्ड ट्रम्प व्हेनेझुएलावरील कारवाईमुळे पुन्हा एकदा चर्चेत आलेत. दरम्यान, त्यांनी भारताबाबत एक महत्त्वपूर्ण विधान केलंय. ट्रम्प यांनी भारताला इशारा देत, देशावरील टॅरिफ आणखी वाढवता येऊ शकते असे म्हटले आहे. तसेच त्यांनी पंतप्रधान नरेंद्र मोदी आणि रशियाचाही उल्लेख केला. भारतावर शुल्क लादण्याबाबत ट्रम्प यांनी, “त्यांना खरोखरच या मुद्द्यावर माझे समाधान करायचे होते. पंतप्रधान मोदी खूप चांगले चांगले व्यक्ती आहेत. त्यांना माहित होतं की भारतानं रशियन तेल खरेदी केल्याने मी खूश नाही. मला समाधानी करणं महत्वाचं होतं. जर त्यांनी रशियन तेल खरेदी करणे सुरू ठेवले तर आपण त्यांच्यावर लवकरच शुल्क वाढवू शकतो.”असा इशाराच त्यांनी दिलाय.
