पिंपरी – ऐन मकरसंक्रांतीच्या सणाच्या पार्श्वभूमीवर होऊ घातलेल्या महापालिका निवडणुकीत पिंपरी-चिंचवड शहरात प्रचाराला वेगळाच उत्सवी साज चढला आहे. संक्रांतीचे सामाजिक आणि सांस्कृतिक महत्त्व लक्षात घेत शहरातील विविध प्रभागांमध्ये मोठ्या प्रमाणात महिला मेळावे आयोजित करण्यात येत असून, या माध्यमातून महिला मतदारांपर्यंत थेट पोहोचण्याचा प्रयत्न सर्वच राजकीय पक्षांकडून केला जात आहे. महापालिकेच्या निवडणुकीत शहरातील विविध प्रभागांमधून नगरसेवक निवडून येणार असून, त्यामध्ये महिलांसाठी मोठ्या प्रमाणात जागा राखीव आहेत. याशिवाय सर्वसाधारण प्रवर्गातूनही अनेक महिला उमेदवार रिंगणात उतरल्या आहेत. एकूण उमेदवारांमध्ये महिलांचे प्रमाण लक्षणीय असून, मतदारसंख्येचाही विचार करता शहरात महिला मतदारांची संख्या पुरुषांच्या तुलनेत लक्षणिय आहे. अनेक प्रभागांमध्ये महिला मतदारांचा कौलच निकालाची दिशा ठरवणारा ठरणार असल्याने, त्यांच्यावर लक्ष केंद्रीत केले जात आहे. संक्रांतीच्या निमित्ताने आयोजित हळदी-कुंकू आणि महिला मेळावे हे प्रचाराचे प्रभावी साधन ठरत आहेत. पारंपरिक वाणाच्या माध्यमातून महिलांना साद घालतानाच त्यामध्ये उमेदवारांचे नाव, निवडणूक चिन्हाची आठवण करून देणारे स्टिकर, तसेच भावनिक संदेश असलेली चिठ्ठी अशा ‘गोड पॅकिंग’चा वापर केला जात आहे. चणा, तीळगूळ यासोबत प्रचार साहित्य दिले जात असल्याने या उपक्रमांची शहरभर चर्चा होत आहे. प्रचारादरम्यान अनेक महिला उमेदवार स्वतः घराघरांत भेटी देत आहेत. काही ठिकाणी पुरुष उमेदवारांच्या पत्नी किंवा कुटुंबीय प्रचाराची जबाबदारी सांभाळताना दिसत आहेत. महिलांशी थेट संवाद साधत त्यांच्या समस्या, अपेक्षा जाणून घेण्यावर भर दिला जात आहे. हळदी-कुंकवाच्या माध्यमातून होणारा हा संवाद महिलांमध्ये आपुलकीची भावना निर्माण करत असल्याचे चित्र आहे. शहरातील बहुतांश प्रभागांमध्ये हे महिला मेळावे अक्षरशः ‘हाउसफुल्ल’ ठरत असून, महिलांचा उत्स्फूर्त प्रतिसाद मिळत आहे. संक्रांतीच्या वाणाला आलेला हा राजकीय रंग महिलांमध्येही चर्चेचा विषय ठरला आहे. या अभिनव आणि उत्सवी प्रचारपद्धतीचा प्रत्यक्ष परिणाम मतदानाच्या दिवशी कितपत दिसून येतो, याकडे राजकीय वर्तुळासह सर्वांचे लक्ष लागले आहे.
