पिंपरी – भारतातील निवडणूक अर्थात जगातील सर्वांत मोठ्या लोकशाहीचा एक उत्सव असतो. 2024 पासून शहरात सातत्याने निवडणुकीचे वातावरण आहे. निवडणूक पैशांवर जिंकल्या जात असल्याचे आरोप होत असले तरी निवडणूक स्थानिक पातळीवर अर्थव्यवस्थेला चालना देते, हे सत्य नाकारता येत नाही. समाजातील तळा-गाळापर्यंत विविध कामांच्या माध्यमातून पैसा पोहचू लागतो. अनेकांना तात्पुरता का होईना रोजगार मिळतो आणि अनेक वर्षांपासून दाबून ठेवलेला पैसा बाजारात खेळू लागतो. शहरात देखील चहाच्या टपरीपासून ते गृहिणींपर्यंत अनेकांच्या उत्पन्नात निवडणुकांनी वाढ केल्याचे दिसून येत आहे. यामुळे बाजारत एक आशादायक चित्र निर्माण झाले आहे. 2024 साली झालेल्या लोकसभा निवडणुकीमध्ये एक लाख कोटींपेक्षा अधिक खर्च झाल्याचा अंदाज आहे. हा खर्च किंवा ही रक्कम मोजक्या लोकांमध्ये विभागली न जाता समाजाच्या सर्व स्तरांपर्यंत कमी-जास्त प्रमाणात पोहचली. निवडणूक लढविण्यासाठी सर्वांत महत्त्वाचे असतात ते म्हणजे मतदार आणि मतदारांपर्यंत पोहचण्यासाठी गरजेचे असतात कार्यकर्ते. आज अनेक बेरोजगार तरुण नेत्यांसाठी वेगवेगळी कामे करताना दिसत आहेत. संगणकावर वेगवेगळ्या डिझाइन बनविणारे, पत्रके छापणारे आणि पत्रके वाटणारे, प्रचार गीते तयार करणारे, गाणारे, प्रचारासाठी विविध वाहने चालविणारे, सोशल मीडियावर मोहीम राबविणारे अशा प्रत्येक स्तरावर नागरिकांना प्रत्यक्ष रोजगार मिळत आहे. तर चहा, स्नॅक्स सेंटर, कपडे दुकानदार, लाँड्री अँड ड्रायक्लीनर्स, लाऊड स्पीकर्सवाले, मंडप आणि केटरिंगचे काम करणारे व्यावसायिक आणि इतर विक्रेत्यांना अप्रत्यक्ष रित्या उत्पन्नात मोठी वाढ मिळत आहे. बेरोजगारांच्या हाताला काम निवडणुकीच्या काळात प्रचारासाठी, पत्रके वाटण्यासाठी मनुष्यबळाची गरज पडते. तसेच मतदार यादीवर काम करण्यासाठी आणि सोशल मीडिया सांभाळण्यासाठी शिक्षित तरुणांची गरज भासते. यात मोठ्या संख्येने बेरोजगार असलेल्या तरुणांना काम मिळत आहे. साध्या-सुद्या गृहिणींना देखील महिला उमेदवारांसोबत फिरण्याचे काम मिळत आहे. शहरात शिक्षणासाठी आलेले विद्यार्थी देखील प्रचाराच्या रॅलीमध्ये सहभागी होत आहेत. त्यांच्या वाहनांमध्ये देखील उमेदवार भरपूर इंधन भरत आहेत. त्यांच्या खाण्या-पिण्याची सोय करुन हातखर्चाला काही रक्कमही देत आहेत. उमेदवारांच्या खर्चाला मर्यादा असली तरी हिशोबात न मांडला जाणारा कार्यकर्त्यांचा खर्च उमेदवार खुल्या दिलाने करत आहेत. वाहन मालक-चालकांच्या उत्पन्नात वाढ शेकडो उमेदवारांना आपल्यासोबत वाहनांचा ताफा हवा असतो. यामुळे भाड्याने वाहन देणार्या मालकांच्या तसेच वाहन चालकांच्या उत्पन्नात देखील वाढ झाली आहे. प्रचारासाठी मोठ्या संख्येने फ्लेक्स लावलेल्या रिक्षा, एलईडी स्क्रीनवाले टेम्पो, शहरभर फिरत आहेत. कार्यालय परिसरातील व्यावसायिकांची चांदी शहरात शेकडो उमेदवार निवडणुकीच्या रिंगणात उतरले आहेत. प्रभाग देखील मोठ-मोठे आहेत. एका-एका प्रभागात सरासरी 45 ते 50 हजार मतदार आहेत. यामुळे उमेदवारांना प्रत्येक परिसरात जनसंपर्क कार्यालये उभारावी लागत आहेत. यामुळे शहरात सध्या प्रत्येक रस्त्यावर आणि गल्ली-बोळात देखील जनसंपर्क कार्यालये दिसून येत आहेत. या कार्यालयाच्या परिसरात असलेल्या सर्वच प्रकारच्या व्यावसायिकांच्या उत्पन्नात वाढ झाली आहे. चहाच्या टपरीपासून ते हेयर कटिंग सलून आणि ब्युटी पार्लरचा व्यवसाय देखील वाढला आहे. कार्यकर्त्यांची वाहने देखील नियमितपणे धुण्यासाठी वॉशिंग सेंटरमध्ये जात आहेत. हॉटेल आणि रेस्टॉरेंटच्या भटट्या सकाळपासून रात्री उशिरापर्यंत धगधगत आहेत. स्थानिक व्यावसायिकांनी दिलेल्या माहितीनुसार व्यवसायात दुप्पट तिपटीने वृद्धी झाली आहे.
