Pannalal Surana | समाजवादी चळवळीचे नेते, ज्येष्ठ पत्रकार पन्नालाल सुराणा यांचे वयाच्या 93व्या वर्षी निधन झाले आहे. नळदुर्ग येथील ‘अपना घर’ येथे रात्री जेवण केल्यानंतर त्यांना अस्वस्थ वाटू लागले. त्यातच त्यांना उलटीचा त्रास झाला. त्यामुळे कुटुंबीयांनी त्यांना सोलापुरातील एका सहकारी रुग्णालयात रात्री उशिरा दाखल केलं. मात्र, उपचारापूर्वीच त्यांचे निधन झाल्याची माहिती डॉक्टरांनी दिली. दरम्यान, संपूर्ण आयुष्य समजासाठी देणाऱ्या साथी पन्नालाल सुराणा यांच्या निधनानंतर त्यांचे पार्थिव शरीर शासकीय रुग्णालयला देहदान करण्याचा निर्णय घेण्यात आल्याची माहिती आहे. सामाजिक कारकीर्द – सोलापूर जिल्ह्यातील बार्शी येथे 9 जुलै 1933 रोजी जन्मलेले पन्नालाल सुराणा यांनी विद्यालयीन काळातच राष्ट्रसेवा दलाशी जोडले जाऊन सामाजिक-राजकीय जीवनाची सुरुवात केली. बार्शीत शाळेत असताना ते राष्ट्रसेवा दलात दाखल झाले. पुढे तरुणपणी त्यांनी जयप्रकाश नारायण यांच्या बिहारमधील सोखादेवरा येथील सर्वोदय आश्रमात राहून भूदान चळवळीत भाग घेतला. समाज प्रबोधन संस्थेचे सचिव म्हणून आणि समाजवादी पक्षाच्या राज्य शाखेचे सचिव म्हणूनही त्यांनी काम बघितले. तर महाविद्यालयीन शिक्षण झाल्यानंतर त्यांनी पत्रकारिता केली. मराठवाडा दैनिकाचे ते संपादक होते. शिक्षण, शेती, बेरोजगारी या विषयावर त्यांनी प्रचंड लेखन केलं आहे. ‘ग्यानबाचं अर्थकारण’ हे त्यांचं पुस्तक अनेकांना प्रेरणा देणारं ठरले. आणीबाणीत तुरुंगवास समाजसेवा आणि समाजसुधारणा यांना आयुषाचा श्वास आणि ध्यास मानलेले जेष्ठ समाजवादी नेते पन्नालाल सुराणा यांची आणीबाणीत जेल भोगलेल्या समाजवादी नेते म्हणून देखील वेगळी ओळख आहे. जुना समाजवादी पक्ष, जनतापक्ष, अनेक पुरोगामी संघटना आणि जनआंदोलन यांच्या उभारणीमध्ये पन्नालाल सुराणा यांचा मोलाचा वाटा आहे. चले जाव आंदोलनपासानू ते स्वातंत्र्य चळवळीपर्यंत त्यानंतर स्वातंत्र्य ते आणीबाणी आणि त्यानंतर देशाच्या सामाजिक आणि राजकीय जडणघडणीतील महत्वाचा अनुभव सुराणा यांच्याकडे होता. मराठवाड्यात भुकंपात सर्वस्व गमावलेल्यांसाठी पन्नालाल यांनी सुरु केलेल्या आपलं घर मधून अनेक मुलांची आयुष्य घडली आहेत. त्याशिवाय भूमीहीन शेतकऱ्यांना जमीनी मिळवून देण्यासाठीही त्यांनी संघर्ष केला. मात्र त्यांच्या या निधनाच्या बातमीने राज्यभरातून दु:ख व्यक्त केल जात आहे. हेही वाचा: ” तुमचा पराभव होईल कि शांतता करारासाठी पण कोणी उरणार नाही” ; पुतीनचा युरोपीय नेत्यांना कडक इशारा
