Nalanda Stampede: बिहारमधील नालंदा याठिकाणी आज एका मंदिरात झालेल्या चेंगराचेंगरीत आठ महिला भाविकांचा दुर्दैवी मृत्यू झाला असल्याची माहिती समोर आली आहे. या चेंगराचेंगरीत इतर अनेक जण जखमी झाले असून मृतांपैकी बरेच जण पाटणामधील असल्याचे मानले जात आहे. मृतांचा आकडा वाढण्याची शक्यता आहे. ही घटना दीपनगर पोलीस ठाण्याच्या हद्दीतील माघरा येथील शीतला मंदिरात घडली. जास्त गर्दी आणि अपुऱ्या व्यवस्थेमुळे ही घटना घडल्याचे वृत्त आहे. बचाव आणि मदतकार्य सुरू झाले आहे. प्रशासनाने अद्याप मृत भाविकांच्या संख्येला दुजोरा दिलेला नाही. दर मंगळवारी हजारो भाविकांचे आगमन Nalanda Stampede दर मंगळवारी हजारो भाविक याठिकाणी दर्शनासाठी येतात. या मंगळवारी सुरक्षा व्यवस्था पूर्णपणे ढिसाळ असल्याचे दिसून आले. पूजेसाठी भाविकांची मोठी गर्दी जमली त्याचवेळी चेंगराचेंगरी झाली. मात्र, या घटनेचे नेमके कारण अद्याप कळलेले नाही. दरम्यान, माहिती मिळताच, अनेक रुग्णवाहिका घटनास्थळी दाखल झाल्या आणि एसडीएम (उपविभागीय दंडाधिकारी) देखील पोहोचले. Nalanda Stampede: उपचारासाठी सदर रुग्णालयात दाखल या घटनेत जखमी झालेल्या भाविकांची संख्या अंदाजे १० ते १२ आहे. जखमींना उपचारासाठी सदर रुग्णालयात पाठवण्यात आले आहे. मंदिराचा परिसर पूर्णपणे रिकामा करण्यात आला आहे. या घटनेनंतर मोठा पोलीस बंदोबस्त तैनात करण्यात आला आहे. नालंदा विद्यापीठाचा दीक्षांत समारंभ आज Nalanda Stampede: मिळालेल्या वृत्तानुसार, नालंदा विद्यापीठाचा दीक्षांत समारंभ आज आहे. राजगीर येथील या कार्यक्रमाला राष्ट्रपती द्रौपदी मुर्मू उपस्थित राहणार आहेत. मुख्यमंत्री नितीश कुमार हेही नालंदा विद्यापीठाच्या दीक्षांत समारंभाला उपस्थित राहणार आहेत. त्यांच्यासोबत उपमुख्यमंत्री सम्राट चौधरीही असतील. अशा कार्यक्रमामुळे मंदिराच्या सुरक्षेत ढिलाई झाली होती का, असा प्रश्न यामुळे निर्माण झाला आहे. या संपूर्ण प्रकरणावर प्रशासनाकडून अधिकृत निवेदनाची प्रतीक्षा आहे. ही चूक कुठे आणि कशी झाली, हे तपासानंतर स्पष्ट होईल. सध्या या घटनेमुळे जिल्ह्यात खळबळ उडाली आहे.
