Raj and Uddhav Thackeray Yuti | शिवसेना ठाकरे गट आणि मनसेच्या युतीची आज अखेर अधिकृतरित्या घोषणा झाली आहे. आज (24 डिसेंबर) मुंबईत एकत्र पत्रकार परिषद घेत उद्धव ठाकरे आणि राज ठाकरेंनी युतीची घोषणा केली. ही युती आगामी स्थानिक स्वराज्य संस्थांच्या निवडणुकांसाठी महत्त्वाची मानली जात आहे. युतीमधील जागावाटपाचे आकडे किंवा तपशील सध्या जाहीर करण्यात आले नाहीत. मात्र यावेळी राज ठाकरे यांनी मुंबईचा महापौर मराठी होणार आणि आमचाच होणार, असा निर्धार व्यक्त केला आहे. ठाकरे बंधुंच्या पत्रकार परिषदेतील काही महत्त्वाचे मुद्दे जाणून घेऊयात… उद्धव ठाकरे काय म्हणाले? गेल्यावेळी भाजपने नरेटिव्ह सेट केलं होतं कटेंगे तो बटेंग, असे ते नरेटिव्ह त्यांनी सेट केलं होतं. आता मी सांगतो,आता चुकाल तर संपाल. फुटाल तर पूर्णपणे संपून जाल हे मराठी माणसांना सांगतो. तुटू नका, फुटू नका. मराठीचा वसा टाकू नका, असे आवाहन उद्धव ठाकरे यांनी मराठी जनतेला केलं आहे. मराठी माणसांनी बलिदान देऊन मुंबई महाराष्ट्राला मिळवून दिली. त्याची आठवण होणं स्वाभाविक आहे. आम्ही ठाकरे बंधू बसले आहोत.आमचे आजोबा संयुक्त महाराष्ट्रातील पहिल्या पाच सेनापतींपैकी एक. त्यानंतर माझे वडील बाळासाहेब ठाकरे आणि माझे काका श्रीकांत ठाकरे म्हणजे अख्खं ठाकरे घराणं मुंबईसाठी संघर्ष करत होते. न्याय हक्कासाठी शिवसेना प्रमुखांना शिवसेनेला जन्म द्यावा लागला. पुढच्या वर्षी ६० वर्ष होतील. इतकी वर्ष व्यवस्थित गेली. परत एकदा मुंबईचे लचके तुडवण्याचं काम सुरू आहे. ज्यांचे प्रतिनिधी आज दिल्लीत बसले आहेत. दिल्लीवाल्यांचे मनसुबे आहेत. आपण भांडण करत राहिलो तर हुतात्मा स्मारकाचा अपमान होईल. कर्तव्य म्हणून एकत्र आलो आहोत. एकत्र आलोय ते एकत्र राहण्यासाठी… मुंबईला महाराष्ट्रापासून तोडणाऱ्याचा राजकारणात खात्मा केल्याशिवाय राहणार नाही. ही शपथ घेऊन उतरलो आहोत, असे उद्धव ठाकरे यांनी स्पष्ट केले. राज ठाकरे काय म्हणाले? कोणत्याही वादापेक्षा आणि भांडणापेक्षा महाराष्ट्र मोठा आहे हे मी आधीही बोललो होतो, तिथूनच एकत्र येण्याची सुरूवात झाली. आमचे दोन्ही पक्ष कोण किती जागा लढवणार, कुठे लढवणार, आकडा काय हे सगळं आम्ही आता तुम्हाला सांगणार नाही. महाराष्ट्रात सध्या लहान मुलं पळवण्याच्या टोळ्या फिरत आहे. त्यात दोन जास्त टोळ्या ॲड झाल्या. त्या राजकीय पक्षातील टोळ्या पळवतात जे निवडणूक लढवत आहेत. त्या सर्व उमेदवारांना उमेदवारी दिली जाईल. कधी भरायची ती कळवली जाईल असं म्हणत शिवसेना आणि मनसेची युती झाली हे जाहीर घोषणा करत आहोत. आम्ही मुंबईतील युती जाहीर करत आहोत, राज्यातील इतर पालिकांबाबत चर्चा सुरू असून जसे निर्णय होतील, तशी युती जाहीर करू, मुंबईचा महापौर मराठीच होणार आणि तो आमचाच होणार, असा विश्वासही राज ठाकरे यांनी यावेळी व्यक्त केला. हेही वाचा: प्रतिक्षा संपली! ठाकरे बंधुंच्या युतीची अधिकृत घोषणा; कार्यकर्त्यांकडून जल्लोष साजरा
