राज्यातील २९ महानगरपालिकांच्या निवडणुकीला अवघे काही तास शिल्लक असताना कल्याण-डोंबिवली महानगरपालिकेत (KDMC Election) प्रचार शिगेला पोहोचला आहे. येथील प्रभाग क्रमांक २९ (पॅनल २९) मध्ये सत्ताधारी भाजपकडून मतदारांना पैसे वाटप केल्याचा धक्कादायक आरोप विरोधकांनी केला आहे. सोशल मीडियावर व्हायरल झालेल्या व्हिडीओत पांढऱ्या पाकिटातून ५०० रुपयांच्या ६ नोटा (एकूण ३,००० रुपये) मतदारांना दिले जात असल्याचे दिसून येत आहे. या प्रकरणाने महायुतीतील मित्रपक्ष भाजप आणि शिवसेना (शिंदे गट) यांच्यातील तणाव कमालीचा वाढला आहे. डोंबिवलीत प्रभाग क्रमांक २९ मध्ये भाजपाचे गांधी प्रेम …….! सर्रास पैसे वाटप सुरू आहे. कालचा रेट ३०००/- होता, हे प्रकरण उघडकीस आल्यावर रेट ५०००/- प्रति मत केल्याचे ऐकायला येत आहे. डोंबिवलीत पैसा व गुंडगीरीचा वापर सुरूच आहे.सत्तेचा माज ओसाढून वाहत आहे. pic.twitter.com/fRCkLZnLxZ — Raju Patil ( प्रमोद (राजू) रतन पाटील ) (@rajupatilmanase) January 12, 2026 काय आहे व्हिडिओमध्ये? व्हिडीओमध्ये डोंबिवलीतील प्रभाग क्रमांक २९ मधील महिला मतदार स्वतःहून पांढरी पाकिटे उघडून दाखवत आहेत. त्यात ५०० रुपयांच्या सहा नोटा स्पष्ट दिसत आहेत. महिलांच्या हातात भाजपचे प्रचार पॅम्पलेटही दिसत आहेत. हा व्हिडीओ मनसे नेते राजू पाटील आणि राष्ट्रवादी काँग्रेस (शरद पवार गट) चे आमदार रोहित पवार यांनी सोशल मीडियावर शेअर केला आहे. विरोधकांचे तीव्र आरोप डोंबिवलीत पैसा अन् गुंडगिरीचा वापर – मनसे मनसेचे माजी आमदार राजू पाटील यांनी या प्रकरणी भाजपवर टीकेची झोड उठवली आहे. ते म्हणाले, डोंबिवलीत प्रभाग क्रमांक 29 मध्ये भाजपाचे गांधी प्रेम. सर्रास पैसे वाटप सुरू आहे. कालचा रेट 3000/- होता, हे प्रकरण उघडकीस आल्यावर रेट 5000/- प्रति मत केल्याचे ऐकायला येत आहे. डोंबिवलीत पैसा व गुंडगीरीचा वापर सुरूच आहे. सत्तेचा माज ओसाढून वाहत आहे. भ्रष्टाचाराच्या नोटांना पाय फुटले – रोहित पवार राष्ट्रवादी काँग्रेस पार्टी शरदचंद्र पवार पक्षाचे आमदार रोहित पवार यांनीही हा पैसा भ्रष्टाचार व कमिशनचा असल्याचा दावा करत भाजपवर निशाणा साधला आहे. corruption आणि commission च्या नोटांना पाय फुटायला सुरवात झाली. पण हे फक्त निवडणुकीपुरतंच दिसेल, नंतर पाच वर्षे कुणी ढुंकूनही बघणार नाही, असे त्यांनी म्हटले आहे. आत्ता पाहू काय म्हणाले शिंदे गटाचे उमेदवार? शिंदे गटाचे उमेदवार नितीन पाटील याविषयी भाजपला आरोपीच्या पिंजऱ्यात उभे करताना म्हणाले की, गत महिन्यापासून मी भाजपची सर्व पोलखोल केली आहे. त्यामुळे भाजपला जिंकण्यासाठी असे नको ते धंदे करावे लागत आहेत. भाजप कार्यकर्ते दशरथ भवनमध्ये पैसे वाटत होते. त्यांनी पाकिटातून 3 हजार रुपये दिले. भाजपचे बिनविरोध निवडून आलेले विषू पेंडणेकर यांचे कार्यकर्ते मतदारांना पैशांची पाकिटे वाटत होते. ते प्रत्येकाच्या घरात पाकिटे नेऊन टाकतात. ते आम्हाला सरळ मार्गाने हरवू शकत नाहीत. त्यामुळे असे धंदे करत आहेत, असे ते म्हणाले. भाजपचे स्पष्टीकरण आणि प्रत्यारोप भाजप जिल्हाध्यक्ष नंदू परब यांनी हे आरोप पूर्णपणे फेटाळले. ते म्हणाले, “शिंदे गटाचा आरोप खोटा आहे. आमचे कार्यकर्ते त्या भागात फक्त पत्रके वाटण्यास गेले होते. त्यांच्या खिशात पैसे कोंबून त्यांना मारहाण करण्यात आली. आम्ही ही दादागिरी आणि दडपशाही खपवून घेणार नाही.” असे स्पष्टीकरण दिले आहे. प्रभाग क्रमांक २९ मधील लढत अ : भाजपच्या कविता म्हात्रे विरुद्ध शिवसेनेच्या रुपाली म्हात्रे ब : भाजपच्या आर्या नाटेकर विरुद्ध शिवसेनेच्या रंजना पाटील क : भाजपचे मंदार टावरे विरुद्ध शिवसेनेचे नितीन पाटील ड : भाजपच्या अलका म्हात्रे विरुद्ध शिवसेनेचे रवी पाटील घटनेच्या वेळी दोन्ही बाजूंचे कार्यकर्ते आमने-सामने आले होते. पोलिसांनी हस्तक्षेप करून परिस्थिती नियंत्रणात आणली आहे. निवडणूक आयोग आणि पोलिसांकडून चौकशी सुरू असून, मतदारांना पैसे वाटपाच्या आरोपांमुळे प्रचाराला नवीन धार चढली आहे. मतदानाच्या तोंडावर अशा घटना राज्यातील इतर महापालिकांप्रमाणे कल्याण-डोंबिवलीतही राजकीय वातावरण अधिक तापवत आहेत. यामुळे मतदारांमध्ये संभ्रम आणि निवडणूक प्रक्रियेवर प्रश्नचिन्ह निर्माण झाले आहे.
