नाशिक: महापालिका निवडणुकीच्या रणधुमाळीत नाशिक भाजपमध्ये ‘एबी’ फॉर्म पळवापळवीवरून उडालेला गोंधळ आता टोकाला पोहोचला आहे. पक्षाची शिस्त धाब्यावर बसवून अधिकृत उमेदवारासमोर आव्हान उभे करणाऱ्या माजी नगरसेविका अलका अहिरे आणि पदाधिकारी कैलास अहिरे यांची भाजपने सहा वर्षांसाठी पक्षातून हकालपट्टी केली आहे. विशेष म्हणजे, तांत्रिक कारणामुळे अलका अहिरे यांच्याकडे ‘कमळ’ हे अधिकृत चिन्ह गेल्याने, मतदारांनी ‘कमळा’ला मतदान करू नये, असे अजब आवाहन करण्याची वेळ भाजपवर आली आहे. एबी फॉर्मच्या गोंधळाचा फटका- उमेदवारी अर्ज भरण्याच्या शेवटच्या दिवशी भाजपच्या गोटात मोठा गदारोळ झाला होता. काही इच्छुकांनी एबी फॉर्म पळवून ते थेट निवडणूक कार्यालयात सादर केल्याने एकाच जागेवर पक्षाचे दोन अर्ज दाखल झाले. निवडणूक नियमानुसार ज्यांचा अर्ज आधी सादर झाला, त्यांना अधिकृत उमेदवार मानले गेले. यामुळे सिडको विभागातील प्रभाग २६ मध्ये पक्षाची मोठी अडचण झाली. पक्षाने येथे पुष्पावती पवार यांना उमेदवारी जाहीर केली होती, मात्र तांत्रिकदृष्ट्या अलका अहिरे या ‘कमळ’ चिन्हाच्या अधिकृत उमेदवार ठरल्या. बंडखोरांवर कठोर कारवाई- पक्षाने अलका अहिरे यांना माघार घेण्याच्या किंवा अधिकृत उमेदवार पुष्पावती पवार यांना पाठिंबा जाहीर करण्याच्या सूचना दिल्या होत्या. मात्र, अहिरे यांनी या सूचनांकडे पाठ फिरवत आपली उमेदवारी कायम ठेवली. या बंडखोरीमुळे पक्षाची प्रतिमा मलिन झाल्याचा ठपका ठेवत शहराध्यक्ष सुनील केदार यांनी अहिरे दांपत्यावर हकालपट्टीची कारवाई केली आहे. “एबी फॉर्म वाटपाच्या प्रक्रियेत जाणीवपूर्वक गोंधळ घालून पक्षशिस्तीचा भंग करण्यात आला. वारंवार सूचना देऊनही त्यांनी अधिकृत उमेदवाराला पाठिंबा दिला नाही, त्यामुळे ही कठोर कारवाई करण्यात आली आहे.” — सुनील केदार, शहराध्यक्ष, भाजप. मतदारांना ‘वेगळे’ आवाहन- प्रभाग २६ मध्ये अलका अहिरे यांच्याकडे ‘कमळ’ हे चिन्ह असले तरी, मतदारांनी त्यांना मतदान करू नये. त्याऐवजी भाजप पुरस्कृत अधिकृत उमेदवार पुष्पावती पवार (ज्यांना अन्य चिन्ह मिळाले आहे) यांनाच मतदान करावे, असे पत्रक भाजपने प्रसिद्ध केले आहे. सिडकोतील अन्य दोन जागांवरही अशीच परिस्थिती असल्याने, कार्यकर्त्यांना ‘कमळ’ सोडून इतर चिन्हांचा प्रचार करण्याची कसरत करावी लागत आहे. निवडणुकीच्या तोंडावर ‘आपल्याच चिन्हाच्या विरोधात’ प्रचार करण्याची ही वेळ भाजपवर आल्याने राजकीय वर्तुळात मोठी चर्चा रंगली आहे.
