IAS Transfer : महाराष्ट्राच्या प्रशासनात पुन्हा एकदा मोठा फेरबदल करण्यात आला असून पाच वरिष्ठ आयएएस अधिकाऱ्यांच्या बदल्या जाहीर करण्यात आल्या आहेत. याआधीही काही दिवसांपूर्वी तुकाराम मुंढे यांच्यासह अनेक अधिकाऱ्यांच्या बदल्या झाल्या होत्या. आता पुन्हा एकदा प्रशासनात हालचाल दिसून येत आहे. या फेरबदलामध्ये डॉ. बी. एन. पाटील, मंगेश जोशी, कुलदीप जंगम, कुशल जैन आणि रेवैया डोंगरे यांचा समावेश आहे. (IAS Transfer) पर्यटन विभागाचे संचालक डॉ. बी. एन. पाटील यांची उच्च व तंत्र शिक्षण विभागात बदली करण्यात आली असून त्यांना ‘रुसा’ प्रकल्पाच्या संचालकपदी नियुक्त करण्यात आले आहे. यशवंतराव चव्हाण विकास प्रशासन प्रबोधिनीचे उपमहानिदेशक मंगेश जोशी यांची पर्यटन विभागात बदली करण्यात आली आहे. सोलापूर जिल्हा परिषदेचे मुख्य कार्यकारी अधिकारी कुलदीप जंगम यांची पिंपरी-चिंचवड महानगरपालिकेत अतिरिक्त आयुक्त म्हणून नियुक्ती करण्यात आली आहे. आयटीडीपी प्रकल्प अधिकारी कुशल जैन यांची सोलापूर जिल्हा परिषदेच्या मुख्य कार्यकारी अधिकारीपदी बदली करण्यात आली असून त्यांनी कुलदीप जंगम यांची जागा घेतली आहे. (IAS Transfer) तर धाराशिव येथे कार्यरत असलेले सहायक जिल्हाधिकारी रेवैया डोंगरे यांची आयटीडीपी प्रकल्प अधिकारी तसेच केळापूर उपविभागाच्या जिल्हाधिकारीपदी नियुक्ती करण्यात आली आहे. या बदल्यांमुळे राज्याच्या प्रशासनात पुन्हा एकदा मोठी हालचाल झाल्याचे चित्र दिसत आहे. (IAS Transfer)
