Satara Accident | एक मन हेलावून टाकणारी घटना साताऱ्यात घडली आहे. भारतीय सैन्य दलात कार्यरत असलेले जवान प्रमोद परशुराम जाधव हे पत्नीच्या डिलिव्हरीसाठी सुट्टी घेऊन गावी आले होते. मात्र त्यांचा अपघाती मृत्यू झाला. एकीकडे पित्याचे निधन, तर दुसरीकडे नवजात बाळाचा जन्म अशी हृदयद्रावक घटना घडल्याने सर्वच जण स्तब्ध झालेत. वीर जवान प्रमोद परशुराम जाधव हे मूळचे सातारा तालुक्यातील दरे गावचे होते. ते सिकंदराबाद–श्रीनगर येथे भारतीय सैन्य दलात सेवा बजावत होते. प्रमोद जाधव यांना आई नसल्याने पत्नीच्या डिलिव्हरीसाठी ते सुमारे आठ दिवसांपूर्वी सुट्टीवर गावी आले होते. काही कामानिमित्त दुचाकीवरून वाढे फाट्याच्या दिशेने जात असताना आयशर टेम्पोने त्यांच्या दुचाकीला जोरदार धडक दिली. या भीषण अपघातात प्रमोद यांचा जागीच मृत्यू झाला. त्यांच्या अपघाताची बातमी कळताच कुटुंबीयांसह गावात शोकाकुल वातावरण निर्माण झाले. Satara Accident | नवजात बालिकेने घेतले वडिलांचे अखेरचे दर्शन आज सकाळी वीर जवान प्रमोद जाधव यांचे पार्थिव त्यांच्या मूळ गावी दरे येथे आणण्यात आले. त्याचदरम्यान त्यांच्या पत्नीने एका गोंडस बालिकेला जन्म दिला होता. याचवेळी प्रमोद जाधव यांची पत्नी आणि काही तासांपूर्वी जन्मलेली लेक पित्याच्या अंत्यदर्शनासाठी घेऊन आली होती. नवजात बालिकेने घेतलेले वडिलांचे अखेरचे दर्शन पाहून उपस्थितांचे डोळे पाणावले. यावेळी शासकीय इतमामात वीर जवान प्रमोद जाधव यांना मानवंदना देत अंत्यसंस्कार करण्यात आले. Satara Accident | हेही वाचा: “इंजिनमध्ये बसून मुंबईतील विरोधकांना मशालीने जाळून टाकू”; सभेअगोदर राज ठाकरेंचे मोठं वक्तव्य
