Election News : राज्यातील २९ महानगरपालिकांसाठी गुरुवार, १५ जानेवारी २०२६ रोजी मतदान पार पडले. सर्वत्र मतदारांना आपला हक्क बजावण्याचे आवाहन करण्यात येत असताना, सोलापूर महानगरपालिकेच्या प्रभाग २६ मध्ये एक वेगळाच आणि निदर्शनास आणणारा प्रकार घडला. या प्रभागातील रुबी नगर ते अवंती नगर दरम्यानच्या मुख्य रस्त्याचा प्रश्न गेल्या अनेक वर्षांपासून प्रलंबित असल्याने, तब्बल १५०० नागरिकांनी संपूर्ण मतदानावर बहिष्कार टाकला. प्रलंबित रस्त्याचा दीर्घकाळीन संघर्ष या परिसरातील चार सोसायट्यांमधील रहिवाशांना मुख्य रस्त्याच्या अभावामुळे दैनंदिन जीवनात मोठा त्रास सहन करावा लागतो. विशेष बाब म्हणजे, हा रस्ता ३० ते ३५ वर्षांपूर्वी सार्वजनिक बांधकाम विभागाकडून तयार करण्यात आला होता. मात्र, आता हा रस्ता पूर्णपणे बंद करण्यात आला असून, त्यामुळे या दीड हजार लोकवस्तीला मोठा मनस्ताप सहन करावा लागत आहे. रहिवाशांनी वारंवार महापालिका प्रशासनाकडे लेखी तक्रारी, आंदोलने आणि निवेदने दिली, तरीही कोणताही ठोस हस्तक्षेप झाला नाही, असा त्यांचा ठाम आरोप आहे. राजकीय नेत्याच्या प्लॉटमुळे अडथळा? नागरिकांचे म्हणणे आहे की, या रस्त्याच्या रखडण्यामागे राजकीय हितसंबंध आहेत. संबंधित रस्त्याच्या मधोमध काँग्रेसच्या एका माजी आमदाराचा मोठा प्लॉट असल्याची चर्चा परिसरात जोर धरली आहे. या माजी आमदाराच्या हितसंबंधांमुळे हक्काचा रस्ता अडवला जात असल्याचा थेट आणि स्पष्ट आरोप स्थानिक रहिवाशांनी केला आहे. रस्ता नसल्यामुळे शाळा, रुग्णालय, बाजारपेठ आणि इतर दैनंदिन कामांसाठी नागरिकांना मोठी कसरत करावी लागते, पण राजकीय दबावामुळे प्रशासन आणि लोकप्रतिनिधी याकडे डोळेझाक करत असल्याची भावना येथे निर्माण झाली आहे. भाजपाच्या बालेकिल्ल्यात उमेदवारांची ‘गोची’ प्रभाग २६ हा भाग भारतीय जनता पक्षाचा (भाजप) पारंपरिक बालेकिल्ला म्हणून ओळखला जातो. मात्र, यावेळी संताप इतका तीव्र आहे की, या चार कॉलनींमध्ये साधे मत मागण्यासाठीही कोणताही उमेदवार किंवा राजकीय पक्षाचा पदाधिकारी फिरकलेला नाही. मतदारांच्या रोषाला सामोरे जावे लागेल या भीतीने उमेदवारांनी या भागाकडे पाठ फिरवली असल्याचे बोलले जात आहे. “मत मागण्यासाठी कोणी आले नाही, आमचा प्रश्नही सुटत नाही, मग मतदान कोणाला करायचे?” असा संतप्त सवाल नागरिकांनी उपस्थित केला आहे. या बहिष्काराच्या माध्यमातून नागरिकांनी आपली नाराजी स्पष्टपणे व्यक्त केली आहे.
