Donald Trump: अमेरिकेचे राष्ट्राध्यक्ष डोनाल्ड ट्रम्प यांनी गुरुवारी एक मोठे विधान केले. अमेरिका आणि व्हेनेझुएला यांच्याकडे मिळून जगातील सुमारे ६८ टक्के तेल साठा असल्याचा दावा त्यांनी केलाय. ट्रम्प यांनी वॉशिंग्टनमध्ये भाषण करताना हे विधान केले. ट्रम्प म्हणाले की, अमेरिकेने या वर्षी जानेवारीमध्ये व्हेनेझुएला ताब्यात घेतले असून आता ते त्यांच्या तेल संपत्तीचा वापर करतील. व्हेनेझुएलाच्या भयानक आर्थिक परिस्थितीचा संदर्भ देत ते म्हणाले, “ते खूप अडचणीत होते. तरीही त्यांच्याकडे जगातील सर्वात जास्त तेल आहे”असं ते म्हणाले. दरम्यान, ट्रम्प यांनी पुनरुच्चार केला की अमेरिका आणि व्हेनेझुएला यांच्याकडे जगातील ६८ टक्के तेल साठा आहे. व्हेनेझुएलामध्ये अमेरिकेची लष्करी कारवाई जानेवारीच्या सुरुवातीला झालेल्या मोठ्या लष्करी कारवाईचा संदर्भ देत ट्रम्प म्हणाले की अमेरिकेने व्हेनेझुएलामध्ये प्रवेश केला आणि राष्ट्राध्यक्ष निकोलस मादुरो आणि त्यांच्या पत्नीला ताब्यात घेतले. त्यांनी या कारवाईचे वर्णन एक मोठी लष्करी कारवाई असे केले. Donald Trump: ट्रम्प म्हणाले, “आमच्या प्रमुख अमेरिकन तेल कंपन्या तिथे जातील, अब्जावधी डॉलर्स खर्च करतील, बिघडत चाललेली तेल व्यवस्था दुरुस्त करतील आणि मोठ्या प्रमाणात तेल विकतील.” ‘सत्तेचे संक्रमण होईपर्यंत आम्ही व्हेनेझुएला चालवू’ ट्रम्प यांनी असेही म्हटले आहे की सत्तेचे सुरक्षित संक्रमण होईपर्यंत अमेरिका व्हेनेझुएला चालवत राहील. तथापि, या दाव्याबद्दल आणि लष्करी कारवाईबद्दल कायदेशीर प्रश्न उपस्थित केले जात आहेत आणि हे प्रकरण वादग्रस्त राहिले आहे. तेलाबद्दल ट्रम्प यांचे विधान ट्रम्प यांनी म्हटले आहे की अमेरिका आपला तेल व्यवसाय आणखी वाढवेल आणि जागतिक बाजारात व्हेनेझुएलाचे तेल विकेल. व्हेनेझुएलाकडे जगातील सर्वात मोठे तेल साठे असल्याचे मानले जाते, जे जगातील एकूण तेलाच्या अंदाजे १७ टक्के आहे. हेही वाचा : Bill gates: एपस्टीन प्रकरणावर बिल गेट्स यांनी मौन तोडले; व्यक्त केला पश्चाताप, आरोपांचे खंडन
